Shillong, K’lyngkot 17
U Symbud Myntri Rangbah ka Jylla, Bah Prestone Tynsong u la ïathuh ba ka kynhun jong ki Sikh ka la pynpaw ïa ka jingkwah ban pynkynriah ïa ki briew na Them Metor, Them Ïewmawlong sha ka jaka shipai kaba don sha lyndet jong ka Them Metor.
Kham mynshwa ka Sorkar ka la pynkhreh ïa ka saiñdur (blueprint), ban pynkynriah ïa kiba sah ha Them Ïewmawlong sha ka jaka ba don ka ophis jong ka Shillong Municipal Board (SMB) mynta, hynrei kane ka jingpynkhreh jong ka Sorkar ka la sahteng noh bad ka la mih pat ka jingïakren bad ka tnat Ïada ka ri India ban kyrpad ai ïa ka jaka shipai ha Lum Survey kaba don sha lyndet ka Them Ïewmawlong .
Haba kren bad ki lad pathai khubor ha ka Sngi Thohdieng, u Bah Prestone u la ïathuh ba ka kynhun jong ki Sikh ka la leit ïakren hi ha Delhi halor kane ka jingkwah da kaba ïakynduh ruh ïa u Myntri Ïada Ri, u Rajnath Singh ban kyrpad na u ban ai da ka jaka shipai. “Ka don ka jingïakren na ka liang ka kynhun ki Sikh hangtei ha Delhi, ha kaba ki leit ïakynduh ïa u Myntri Ïada Ri dalade ban kyrpad ba lada lah balei ym ai ha ka jaka shipai”, u la ïathuh.
“Hadien ba ngi ïoh ïa kane ka jingtyrwa, hadien ba la ïoh jingtip ba ki la leit ïakynduh sha ki heh ha Delhi, ngi na ka liang ka Sorkar ngi sngew ba kata ruh ka dei kaba biang. Kumta ngi la thoh sha u Myntri Ïada Ri ban kyrpad, lada long kaba lah ban pdiang ïa kane ka jingtyrwa”, u la ong.
U Bah Prestone u la ïathuh ruh ba dang shen ma u ryngkat bad u Myntri Rangbah, Conrad K Sangma ki la ïakynduh ïa u Myntri ka Sorkar Pdeng bad la dep ruh ban ïakren halor kane ka mat. Katkum ka jingong jong u, u Myntri u dang bishar bniah ïa kane ka jingkyrpad ban ai jaka.
“Lada ngi ïoh ïa kata, kan nang pynsuk shuh shuh namar ka Sorkar kam donkam shuh ban ai jaka. Kumba la ong mynta ka dang sahkut shwa hangta”, u la ong.
U Symbud Myntri Rangbah u la ong ba ka Sorkar mynta ka dang ap ïa ka jubab na ka tnat Ïada Ri, lada ka pdiang ïa kane ka jingkyrpad, kan don biang ka jingïakynduh bad ka Harijan Panchayat Committee (HPC) ban pynkynriah ïa ki ha ka jaka ba ki kwah. Hynrei ha kajuh ka por, u la ong ba lada ka jubab na ka Ministry ka long da kumwei pat, ka jingtyrwa kaba la pynkhreh bad phah da ka Sorkar kan treikam namar ba ym don lad shuh da kumwei pat.
Haba kylli, u Bah Prestone u la ïathuh ba ka jaka jong ki shipai kaba don ha Lum Survey ka don kumba 2 akar eiei, bad lada ïoh ïa katei ka jaka ka la biang palat ban pynkynriah ïa baroh 342 tylli ki longïing.
