Shillong, K’lyngkot 17
Ka jingmang pisa ban shna ïa ka surokbah kaba pynïasoh ïa ka Silchar bad Guwahati lyngba ka Meghalaya ka kot palat T.25 hajar klur ha kaba T.15 hajar klur ka dei kaba hap ha Meghalaya.
U Symbud Myntri Rangbah, Bah Prestone Tynsong, u la ong ba kane ka jingmang pisa ban shna ïa ka Express Way ka dei kaba la kynthup lang naduh ka bai shim jaka bad kiwei kiwei.
Kane kan long ka jingmyntoi ïa kine ar tylli ki jylla ynda la dep ban shna ïa kane ka Express Way.
Ha kawei pat ka liang, u Symbud Myntri Rangbah u la ïathuh ba ha kaba ïadei bad ka surokbah na Umïam sha Shillong, la rai ban shna noh da ka four lane ha kaba yn sa pynbit-pynbiang ïa ka bynta ban pynïaid ïa kane surok da kaba ïaid lait noh ïa ka jingkieng ha Umïam Dam.
U la ong ba ynda la dep ban pynbeit ïa ka jaka ban ïaid ka four lane na Umïam sha Shillong, yn sa lah ban phah pynkhreh ïa ka DPR bad na ka liang ka Sorkar Pdeng ruh ka pdiang sngewbha ïa ka jingtyrwa ban shna noh da ka surok four lane.
Kane ka surok kan long ruh jingïarap ban ïoh ïaid ki kali heh bad kumba ka long mynta ym shah shuh ïa ki kali kiba kit jingkit khia ban ïaid lyngba ka jingkieng Umïam Dam.
