Jowai, K’lyngkot 17
“Nga kwah ba u MDC u jong nga un jop donburom bad tam kput na kane ka shnong ka jong phi bad lada u tam kput ngan leh bha ïa ka shnong ka jong phi hadien ka ilekshon, hynrei lada um tam kput, wat ïa kaba la mut ban ai ruh phim lah ban tip, ngan hap ban pyrkhat arsien”, la ong u Bah Sniawbhalang Dhar haba kren ha ka jingplie ïa ka Community Hall jong ka shnong Nongkhroh ha ka Sngi Thohdieng.
“Nga kwah ba ha ka 21 tarik Rymphang phin ai ka jingkyrshan ïa u Ma Jesse Suiam u kyrtong ka NPP na Nongkhroh Moodymmai konstitwensi khnang ba un jop donburom,” la ong u Bah Dhar uba dei ruh u Symbud Myntri Rangbah ka Jylla bad MLA ka Nartiang.
U la ong ba katno kan long ka jingsarong ban ïoh arngut ki nongmihkhmat kiba don ha ka bor, ha kaba u la kyntu ruh ban ym thew ym woh ïa ki jingduna ha ka jinglong briew, namar kum ki nongmihkhmat ki dap da ka jingduna ha ki liang baroh.
U la khot la wer ruh ïa baroh ki ‘riew rangbah, kynthei bad shynrang ban ïa don ryngkat bad u MDC da kaba ai ka jingkyrshan ïa u ha kane ka ilekshon khnang ba un jop donburom.
Nalorkata, u Bah Dhar u la kyntu ruh ïa ki paidbah nongshong shnong ban ym ngop ha ka jingpynbiej jong kiwei ki seng saiñ hima-sima khamtam ki seng thymmai kiba wan ban pynbiej tang ha ka por ilekshon bad jah klep hadien ka ilekshon.
U la kynthoh ruh ïa ka seng VPP kaba la pynkhih klang ïa ka jingmut jingpyrkhat jong ki paidbah, bad bynrap ba ha kane ka MDC ilekshon, ki paidbah ki la sngewthuh ba ki la bakla ha ka ilekshon MP.
“Nga ïaleh lai sien ïa ka ilekshon MLA, ngam ju shah rem. Hynrei ha ki jingjop jong nga, ar sien ngam da sngewhun bha namar nga tam tang khyndiat”, la ong u Bah Dhar bad pynpaw ïa ka jingkyrmen ba ha u 2028, kumba la ïoh ïa ka ïingdorbar kaba thymmai, ka pyrkhat pyrdaiñ jong ki nongshong shnong ruh kan long kaba thymmai khnang ban lah wanrah ïa ka roi ka par hapoh ka konstitwensi.
