Phra tylli ki projek surok palat T.5000 klur ki ban pynkylla dur ïa ka Jylla

Shillong, K’lyngkot 17

Ka Sorkar Meghalaya Democratic Alliance (MDA-II) ka la pynïaid shaid-shaid ïa ka jingpyntrei ïa ki projek surok ha kylleng ka Jylla. Kine ki projek kiba don haduh phra tylli la pyntrei ha ka jinglut kaba palat T.5000 klur.

U Symbud Myntri Rangbah ka Jylla ba khmih ïa ka tnat PWD (Roads), Bah Prestone Tynsong, ha ka Sngi Thohdieng u la lum ïa ka jingïalang bishar kam halor ka jingpyntrei ïa kine ki projek surok ba kongsan ka Jylla.

Haba kren hadien ka jingïalang, u Bah Prestone u la ong ba kine ki dei tang ki projek kiba heh, ha kaba u la ong ruh ba kam pat don ha ka khana-pateng jong ka Meghalaya haduh mynta ban don ka Sorkar kaba lah ban wanrah haduh katne ki projek.    

“Naduh 1972 haduh mynta, ka dei kane ka Sorkar MDA kaba synshar naduh 2018 kaba la lah ban wanrah haduh katne ki projek kaba ngim ju phohsniew, kaba ngim ju poi pyrkhat. Nga ieh ha ka jingbishar ki paidbah, namar ka jingpynsngewthuh bakla bun jait bun rukom. Ngi kwah ban pyndep ïa kine ki projek ha ka por kaba biang khnang ba kan long ka jingmyntoi ïa ki paidbah ka Jylla Meghalaya baroh kawei”, la ong u Bah Prestone.

Haba ïathuh halor ka jingpyntrei ïa ki surok, u la ong ba ka kam ka la ïaid stet bha ban lah pyndep ha ka por ba la buh, hynrei u la pynpaw ruh ïa katto-katne ki jingeh ba ka Sorkar ka ïakynduh haba pyntrei ïa ka kam namar ka jaka. U la ïathuh ba 75% la pynlut por ban ïakren halor ka kam thied jaka ha ka jingïalang bishar kam.

Ki phra tylli ki projek surok ba heh ba ka Sorkar ka la ïaid shakhmat ki long, ka Shillong Western Bypass, package 1 kaba 12.8 km ha ka jingmang pisa kaba long T.620 klur, package II kaba 11.90 km ha ka jingmang kaba long T.686 klur bad package III kaba 13.55 km ha ka jingmang pisa kaba long  T.562 klur. Ka surok Shillong-Dawki  kaba la mang T.1200 klur, ka surok Nongstoiñ-Rambrai-Kyrshai kaba jrong 33 km la mang pisa T.359 klur, ka surok Dainadubi-Darugre  kaba jrong 40 km la mang pisa T. 705.83 klur, ka surok Darugre- Williamnagar kaba jrong 36 km la mang pisa T.801 klur, ka surok Tura-Dalu  kaba jrong 51km la mang pisa T.610 klur, ka surok Tura Bypass la mang pisa T. 943 klur, bad nalor kine la pynkhreh ruh ban shna ïa ka surokbah ba la tip kum ka ‘High Speed Corridor’ na Mawlyngkhung lyngba ka ‘Fly Over’ kaba don ha Umïam sha Panchgram, Assam ka ban pynlut haduh T.25000 klur bad tang ha Meghalaya ka jingpynlut kan long T.15000 klur.

U Bah Prestone u la pyntip ba u la bthah ïa baroh ki tnat ba dei khmih ba kin pynstet bad pynkloi ïa ka jingtreikam khnang ban lah pyndep noh ïa kine ki projek kham kloi katba lah, da kaba bynrap ba kine ki surok kin long ki jingkyrkhu ïa ka Jylla Meghalaya.

“Hadien ba la dep lut kine ki projek kan pynkylla dur syndon ïa ka Jylla”, la ong u Symbud Myntri Rangbah.