Nongpoh, K’lyngkot 17
Ka Ri Bhoi Youth Federation (RBYF) ha ka jingïalang General Executive Council kaba la pynlong ha ka Sngi Balang ha shlem treikam ka seng ha Saiden, ka la jied biang ïa u Bah Bipul Thangkhiew kum u President na ka bynta ka samoi treikam jong u snem 2025 haduh 2028.
Ïa kine ki nongïalam ba thymmai jong ka seng hapoh ka jingïalam u Bah Bipul Thangkhiew la wan ban pynskhem da u Bah BB Makdoh, President barim ka seng ha ka jingdon ryngkat u Bah E.K Lapang, Rangbah Shnong ka Saiden bad uba dei ruh uwei na ki nongïalam barim ka seng ha ki por kiba mynshwa ryngkat ka jingdon lang ki nongïalam na ki Zone, Circle bad Unit bapher bapher.
Nalor u Bah Bipul Thangkhiew, kiwei ki nongïalam kiba la shah pynskhem, ki kynthup ïa u Bah AG Sten kum u Chief Adviser, Bah Liandar Nongshli kum u Working President, Bah OB Marbaniang kum u Vice President, Bah K Nengnong kum u General Secretary, Bah Denis Syngkli kum u Assistant General Secretary, Bah PP Kylla Chief Organizing Secretary, Bah Balawan Marwein Finance Secretary, Bah RJ Thangkhiew Political Secretary, Bah Wanpher S Wahlang Publicity Secretary, Bah S Marbah Education and Environment Secretary, Bah N Makdoh Sports Secretary, Bah E Kharbani Organising Secretary, Bah D Warjri Transport Secretary bad u Bah S Hinge kum u Employment & Agriculture Secretary nalor kiwei kiwei.
U BB Makdoh bad u Bah E.K Lapang haba ai jingkren ha kane ka sngi, ki la ai ka jingïaroh ïa ki dkhot jong ka seng kiba la ïohi jngai bad ibit ban pynkhamti biang ïa ka lyngkor kaba khia ha u Bah Bipul Thangkhiew ban long biang kum u nongïalam ka seng, u ba lah ban ïalam bad kyntiew ïa ka seng da kaba ai nuksa ruh halor ka jinglah ban shna bad pyndep ïa ka shlem treikam ba pura ka seng ha kine ki snem.
Ki la ai ruh ïa ki ‘tien sneng ‘tien kraw sha kine ki nongïalam ba thymmai jong ka seng ba kin long kiba don akor don burom bad kiba don ïa ka jingkitkhlieh ban shakri na ka bynta ka bha ka miat bad ka jingmyntoi jong ka imlang ka sahlang ha ka district bad ka jylla hi baroh kawei.
