Nongpoh, K’lyngkot 17
Ka Umroi Democratic Front (UDF), ka kynhun kaba la thaw thymmai hapoh ka jingïalam jong u MLA barim, Bah George B. Lyngdoh bad u Bah Arbinus Lyngdoh ryngkat ki spah ngut ki paidbah nongkyrshan ha ka jingïalang paidbah kaba la pynlong ha ka Sngi Thohdieng ha Umroi Umdohbyrthih, ki la shim ïa ka rai rangbah ban pynïakhun noh da u Bah George B Lyngdoh kum u kyrtong shimet na Umroi konstitwensi ha kane ka ilekshon MDC ka ban long u bnai Rymphang mynta u snem.
U Bah George Lyngdoh u dei uwei na ki nongpan tiket na ka Umroi Constituency Prog -ressive Forum (UCPF), hynrei u la hap ban weng noh ïa la ka kyrteng na ka bynta ban ailad ïa u Bah MD Syiem ban ïakhun na kane ka kynhun. Phewse, utei u rangbah uba ka UCPF ka la dep ban ai tiket, u la shet kylla da kaba leit pynïasoh sha ka seng Congress bad knieh ruh wat ïa ka tiket na u Bah Arbinus Lyngdoh.
Katei ka jingshet kylla jong u Bah MD Syiem ïa ka UCPF bad ka jingshah pynduh tiket jong u Bah Arbinus Lyngdoh ha ka seng Congress, ka la pynlong ïa kine ki ar kynhun ban ïamir jingmut lang, ha kaba hynne ka sngi da kawei ka wei ka sur, ki la shim ïa ka rai rangbah ban ïatreilang, ban sei da u Bah George Lyngdoh ha ryngkat ka jingmynjur jong ki spah ngut ki paidbah kiba la wan ban kyrshan met bad mynsiem ha kane ka sngi.
Haba kren sha ki lad pathai khubor, u Bah George u la pynpaw ïa ka jingsngewnguh kaba khraw ïa ki paidbah ka Umroi konstitwensi kiba la wan ban ïadon ryngkat ha kane ka sngi, hadien ba na ka liang ka jong u lem bad u Bah Arbinus Lyngdoh, MDC barim jong ka Umroi konstitwensi ki la rai ban pynlong ïa ka jingïakynduhlang ban lum ban lang ïa ki paidbah nongkyrshan na ka bynta ban pyrkhat ïa ka lawei jong ka konstitwensi bad khamtam eh kyrpang na ka bynta kane ka ilekshon MDC 2025.
U la ïathuh ruh ba ha ka jingïakynduh bad u Bah Arbinus, la ïamir jingmut halor ka jingduhnoh jong ka UCPF ïa la u kyrtong, uba la leit ban pynïasoh sha ka seng Congress kaba kim ïahap jingmut bad ka jingshah pynduh tiket jong u Bah Arbinus ha ka seng Congress.
Na ka liang u Bah George u la buh ka jingkyrpad ïa ki paidbah ka Umroi konstitwensi kiba la ju kyrshan ïa u ha ki snem ba la dep bad ruh kiba ju kyrshan ïa u Bah Arbinus, ba kin sngewbha ban ai lem ïa ka jingkyrshan kaba pura ha kane ka kynti na ka bynta ban saiñdur thymmai pat ïa ka Umroi konstitwensi.
Na ka liang u Bah Arbinus ha kane ka sngi u la pynpaw ïa ka jingsngew lyngngoh bad sah umdum halor ka jingshah pynduh tiket ha ka seng Congress, ka seng kaba u la ïadon ryngkat bad trei shitom ban lum ban lang bad ban pynkhlaiñ mynta la bun bun snem kynthih, da kaba ïathuh ruh ba u la dep ban bud ryntih thik kumba la bthah da ki nongïalam ka Meghalaya Pradesh Congress Committee (MPCC), hynrei katba ïa ka tiket pat la ai pynban ha u Bah MD Syiem uba dang pynïasoh sha ka seng tang artaïew eiei.
U Bah Arbinus u la ong ruh ba katei ka jingshah pynduh tiket ha ka seng Congress, ka la pynlong ïa u bad ïa ki nongkyrshan ba kin mih noh na ka seng Congress bad shim ïa rai ban ïatrei ryngkat ryngkat met bad mynsiem ban pynjop donburom ïa u Bah George B Lyngdoh ha kane ka ilekshon MDC 2025.
