Mawkyrwat, K’lyngkot 19
Kawei ka ïing kaba don ha ka shnong Tynnai ha South West Khasi Hills District ka la shah bam duh ha ka ding kaba la klang katta-katta bad pynkylla dpei ïa baroh ki jingdon-jingem. Ha katei ka jingjia uwei u khyllung uba dang 2 snem tam u la lait im salit na ki tyrsim jong ka ding.
Katei ka ïing kaba la shah bam duh ha ka ding ka dei jong ka Kong Badaphylla Jyrwa, 23 snem bad u Bah Famous Syiemlieh, 25 snem kiba don ar ngut ki khun, uwei uba dang 2 snem tam bad iwei pat ba dang 4 bnai. Kane ka jingjia pluh ding jong katei ka ïing ka la jia ha ka janmiet jong ka 18 tarik u Kyllalyngkot, 2025.
Katkum ka jingïathuh jong u Myntri Shnong, Bah Twelding Jyrwa, la ong ba katei ka jingjia ka la jia ha ka por kumba 6 baje eiei janmiet ha ka por ba ka kmie bad u kpa kim don ha ïing.
U la ïathuh ruh ba ka Kong Bada Jyrwa ka la pynthiah ïa u khun nyngkong ha jingthiah bad ïalade ka la leit sha ïing jong ka kmie kaba don kham pajih ban leit pan jingpan. Hynrei, ynda ka la wanphai ka la kyndit ban ïohi ïa ka ding bad kumta ka la lynñiar bad pyrta briew. Kumne da ka jingkloi ki para marjan bad ki para shnong wut-wut ki la ïoh ban sei noh ïa utei u khyllung khlem kano-kano ka jingmynsaw.
Na ka liang u Bah Twelding Jyrwa u la ïathuh ruh ba ïa ka daw tynrai jong ka jingpluh ding jong katei ka ïing haduh mynta ym pat shym la lah ban tip bad u la ïathuh ruh ba ka jingjulor baroh ka la kot sha kumba T.3 lak eiei.
