Shillong, K’lyngkot 19
Hadien ba u Symbud Myntri Rangbah ka Jylla bad uba dei ruh u Chairman jong ka High Level Committee (HLC), Bah Prestone Tynsong, u la ïathuh ba ki briew kiba sah ha Them Ïewmawlong ki la kyrpad na ka Sorkar ban pan jaka sah ha ka jaka shipai kaba don ha Lum Survey, kumta na ka liang ka Khun Hynñiewtrep National Awakening Movement (KHNAM) ka la pynpaw ïa ka jingpyrshah jur halor kane.
U Working President ka KHNAM, Bah Thomas Passah, u la ong ba ka jingpan jaka jong kitei ki briew ha Lum Survey kaba dei hajan jong ka ïew ka pynpaw ba kine ki briew kim kwah ban mih na katei ka jaka bad ka pynpaw ruh ba kine ki briew ki kwah ban sah ha ki jaka ba long ïew khnang ba kan don ka jingïohnong.
Haba kren sha ki lad pathai khubor ha ka sngi Saitjaiñ u Bah Thomas u la ong ba ka jingthmu ban pynkynriah ïa kitei ki briew na Them Ïewmawlong ka dei namar ka jingkhapngiah eh katei ka jaka bad ong ba katei ka jaka ka dei ka jaka ïa khaïi bad ka jaka ïadie-ïathied bad kam dei satia ka jaka sah jongno-re-jongno.
U la ong ba kane ka jingsah jong kine ki briew ka la wanrah ïa ka jingpyrshah bad jingkulmar bad ong ba kam don jingmyntoi satia ban pynkynriah biang ïa kitei ki briew hajan jong ka ïew hynrei kaba donkam ka long ban pynkynriah beit ïa ki shabar jong ka ïew kaba long kham jngai na kane ka jaka paidbah.
Shuh-shuh, u la ong ba mynta la sakhi lyngba ki lad pathai khubor ba kine ki briew kiba sah ha Them Ïewmawlong ki kwah ban jied hi ïa ka jaka ba kin leit ban sah bad kata ruh ki la jied hajan ha Lum Survey kaba dei ruh ka ktem kaba mih bha ki kam sniew bad kane kan ailad ïa ki ban dang ïai bteng ban leh ïa ki kam sniew bad kane ka jaka ba la pan da kitei ki briew ka dei hajan ka ïew ha kaba na ka liang ka seng kam sngew ïahap ban ai ïa kane ka jaka sha kitei ki briew.
U la ong kumba la ïohi ba ha kine ki sngi ha Lum Survey ki la mih shibun ki kam sniew bad lada pynkylla jaka sah hapoh ka Lum Survey lehse, ki kam sniew ki nang ïai jur ha katei ka jaka.
U la ong ruh ba kane ka mat Them Metor ka paw shai ba ka dei ka mat pynbiej ilekshon namar ha shwa ka MLA ilekshon ka don ka jingïakren halor kane ka jingpynkynriah ïa kitei ki briew na katei ka jaka hynrei hadien ka ilekshon ka la mih biang kane kajuh ka mat ïakren kata hashwa ka ilekshon MDC.
“Ka Sorkar kam dei ban pyrkhat saiñ pyrthei halor kane ka mat hynrei ka dei ban peit da ki khmat saiñ pyrthei ïa kane ka mat bad da ki khmat kiba shimkhia khnang ba kan wanrah shisha ïa ka jinghun bad ka jingangnud jong u paidbah”, ong u Bah Thomas.
Na ka liang ka seng ka kwah ba kine ki briew kiba sah ha Them Metor dei ban pynkynriah noh ïa ki sha ki jaka sah jong ka tnat Municipal hynrei kam long kaba ïahap pat ban shu ai jaka sah lang ïa ki baroh ha ka shi jaka namar kane kan wanrah biang ïa ki huri-hura kiba bunjait.
