Shillong, K’lyngkot 19
Ki pulit jong ka South West Garo Hills ki la ïoh ban kurup noh ïa u drok heroin bad kumjuh ïa ki dawai kuli Yaba (methamphetamine) na uwei u briew na ka thaiñ Ambari hajan jong ka Kiln Factory ha South West Garo Hills.
Katkum ka tyllong khubor kaba la ïoh lum la ong ba une u briew uba la shah bat noh ba la suba ba u dei u nongkhaïi, la tip kyrteng kum u Md Aktar Hussain, 32 snem ka rta, uba dei na ka shnong Kanaimara na Assam.
Na une u briew la ïoh ban kurup ar tylli ki synduk buh sabon ba la thep ïa u drok heroin uba khia kumba 19.12 gram bad ruh haduh 992 tylli ki dawai kuli Yaba bad la kurup noh ïa ka arshaka kaba u la pyndonkam kaba don ïa u nombor AS17-J-2814.
