Shillong, K’lyngkot 19
U MLA ka Voice of the People Party (VPP) na North-Shillong, Bah Adelbert Nongrum, u la kyrpad ïa ki paidbah ba kim dei ban shah pynsngewthuh bakla ha kum kane ka por ba la jan ka ilekshon MDC bad kum u nongmihkhmat un ym sngap, hynrei un sa kren haba ïadei bad ka ilekshon ka ban wan ynda la dei ka por.
“…ban shakri ïa ka konstitwensi, ban shakri khamtam ïa ka jaidbynriew lyngba ka jinglong kum u nongmihkhmat bad kum u nongmih-khmat, kan ym long ban long tang kum u nongmihkhmat, hynrei ngin hap long kita ki nongïasaid, ngin hap long ruh kita ki nongthaw aiñ,” ong u Bah Nongrum haba ai jingkren ha ka jingïalang pynhap pyrda jong ka ‘Mission Week-2025’ ha Mission Compound ha ka Sngi Saitjaiñ.
Haba pynsngew ba ki aiñ ki long kiba donkam haduh katta-katta, u la ong ba ha kum kine ki por, ki paidbah kim dei ban shah pynsngewthuh bakla ha kiba bun ki bynta.
“Mynta ngi don hakhmat duh bad ka ilekshon MDC bad kum u MLA, ngan ym sngap, ngan sa kren ha ka por kaba nga dei ban kren na ka bynta ba ki paidbah jong kane ka konstitwensi…ar tylli, khamtam kiba nga mihkhmat na ka 17-North kaba ktah lang ïa ka Jaïaw-Mawprem khamtam ïa ka Mawkhar-Pynthor. Ngan sa kren ynda la dei ka por namar ka dei ka jingdonkam, kam dei ka jingkwah,” ong u MLA.
Haba ban biang ba ki aiñ ki long kiba donkam ha District Council, u la ong, “Balei ngin pynsngewthuh bakla, ngi donkam ban ïakhih tylli bad ki nongmihkhmat ha Ïingdorbar Thawaiñ ka Jylla kumno ban weng noh pat ïa ka ‘Para 12 (A)’ kaba pynwit ïa ka jingtreikam jong ka District Council.”
U la ong ruh ba ïa kane ka mat la leh klet na kawei ka samoi treikam sha kawei pat.
“Kaei kaba ngin pynbha, kaei ba ngin pynkhlaiñ, ka long kawei ka mat kaba donkam bha ha District Council,” u la ong.
Ha kajuh ka por, haba kren halor ka ‘Rule 128’, u la ong, “Kane kaba ki sngap jar, balei ki sngap jar? Ki tieng thot-thot naba ki jingthmu kiba bun…ka dei ba hapoh ka District Council ka dei ka jylli kaba rit, kin hikai jngi bad kin sa poi pat sha ka jylli kaba heh, ka duriaw bah jong ka Ïingdorbar Thawaiñ ka Jylla.”
Haba kdew ba ka mat halor ka ‘Rule 128’ ka dei kaba u ju kren barabor, wat hapdeng ka jinglong marwei, u Bah Nongrum ha kawei ka liang u la pynpaw ka jingsngewkmen ba u ïoh ban pynsngew halor kane ka bynta bad kyrmen skhem ba kan sa urlong shisien ka sngi.
“Kumba nga la pyrshang kumno ban wanrah jingkylla haba ïadei bad ka ‘Presidential Act, 1950’ – ka por ka la dei ba ym dei shuh ban ithuh ne ai bor ïa kiwei pat ki para jaidbynriew kiba don ha N.E. kiba la ithuh kyrpang ïa ki – ki ïoh ban thied jaka bad ki ïoh ïa ki hok kiba ma ngi, ngi ïoh. Nga la kren lai-saw sien ha ka jinglong marwei ha District Council,” u la ong.
Shuh-shuh, u la bynrap, “Kum uwei napdeng u dkhot ka liang pyrshah, nga la ïoh ban pynkohnguh bad kane nga tharai ka lah ban dei ka ‘History’, naba ki liang pyrshah kim ju da kham lah ban pynkohnguh ïa ka Sorkar, hynrei nga sngewkmen ba ka Sorkar ka la ai ka jingkular ba kan wanrah ïa ka jingkylla jong kane.”
