Nongstoiñ, K’lyngkot 19
Ki paidbah nongshong shnong naduh ki khynnah ki samla, ki rangbah, ki longkmie ki longkpa na ki hynñiew tylli ki shnong ba kynthup ïa ka shnong Langja, Khyllemsangrin, Umthlu, Ktiehthawiar, Mawribah, Ummawri bad Mawjari kiba hap hapoh ka lama jong ka Synjuk ki Nongsynshar Shnong Langja Area ha ka step phyrngab jong ka 18 tarik mynta u bnai ki la ïamih paidbah ban lied bad pynpra noh ïa ka ïing skul barim kaba la shna naduh u snem 1977 ïa kaba ka shnong Langja ka la dep ban iehnoh.
La kam ruh ba ka daw jong ka jingleit ban lied bad pynpra jong ki paidbah ïa katei ka ïing skul barim kaba ka shnong ka la iehnoh ka dei namar ka jingkam trai jong katto-katne ki briew ban pynlong skul shimet da kaba ai kyrteng ruh ka Tbn. N.S Shangdiar Memorial Secondary School kumjuh kiba la pyrshang ban kam trai wat ïa ka khyndew.
U Secretary ka Synjuk ki Nongsynshar Shnong Langja Area, Bah Ulfilas Kharsyiemlieh haba batai bniah halor kane ka kynrum-kynram ha ka thaiñ bad ka shnong Langja West Khasi Hills, u la ong ba ha kaba nyngkong eh ka jingwan shong shnong hapoh ka shnong Langja ka lah ban dei ha u snem 1951 lane 1952. Ki don 7 ngut ki briew, ki nongïalam ïa kita ki 7 ngut ki don 2 ngut; uwei u Bamon bad uwei pat u dei u Raimon. Kine ar ngut ki ïalam ïa ki san ïing bad kine ar ngut (u Bamon bad u Raimon) ki dei kiba don pisa bad ki thied ïa ka Langja hynrei ïa ka dor ym shym la tip. Hynrei ka jingthied jong kine ar ngut ki thied ïa ka shi lyngkhot jong kane ka thaiñ Langja bad haba ki thied ïa ka shi lyngkhot ka khyndew hynrei kine pat ynda ki shna ïa ka ‘map’ ki shna ïa baroh kawei ka thaiñ Langja.
“Ha ka snem 1967, u Plipstondar Parïong u la seng ïa ka skul ba la ai kyrteng ka United Christian ME School bad u Babu Stonly u leh donbor namar u dei u Secretary ka MC ha kata ka por u la bat da ki phew snem marwei bad ki dkhot MC ha kata ka por ki khun jong u ki don 8 ngut bad ka la wan ka jingkylli hapoh ophis ba balei napoh ka ïing phi don haduh saw ngut ki dkhot bad la ïathuh ïa kata ka rukom pynïaid bad ka jingleh donbor, kumta ngi la ïakhun noh ïa kane hapoh ka ïingbishar,” ong u Bah Ulfilas.
U la ong ruh ba ka la ïaid ter ter katei ka skul ha kaba ki Balang marjan marjan ka District bad ka Presbytery ka aiti noh sha ka shnong lyngba ka ophis DI bad ka ïingbishar ka la ai ïa ka hukum ba kane ka skul kam dei shuh ka United Christian Me School Langja hynrei ka la dei noh ka ME School Shnong Langja. Kumta hadien ba la ïoh ïa ka hukum na ka ïingbishar bad na ka liang ka shnong ka la phah register noh ïa kata ka khyndew ha u snem 1991.
“Ha ka por ba ngi la ïoh ïa ka hukum na ka ïingbishar bad ka kyrteng ka la kylla, ngi la rah noh ïa katei ka skul ha kawei pat ka jaka bad la shna da kawei pat hynrei ïa ka skul barim la iehnoh jah hangtei hi ka jaka hynrei u Secretary ka MC ba mynshuwa u leh donbor bad u leit ban kam trai bad leit hikai skul shimet noh ha katei ka ïingskul kaba la iehnoh ha kaba ka shnong kam treh shuh bad hadien ka jingkhlad noh ka jong u, ki khun ki jong u kila pynkylla noh sha ka Tbn. NS Shangdiar Memorial Secondary School ïa katei ïing skul kaba ka shnong kala iehnoh noh, bad ym tang katta, kitei ki briew ki la kam trai ruh ïa ka khyndew kaba kim shym la don ka nongrim bad khlem ki kot ki sla kiba biang,” la ong u Bah Ulfilas.
U la ïathuh ruh ba hadien kane ter ter la bthah bad la ïai kren ïa kitei ki briew ban pynkynriah noh hynrei da ki phew snem ym shym la sngap bad dei halor kane ka nongrim ha ka step jong ka 18 tarik, ki paidbah na ki 7 shnong ki la lied noh ïa ka ïingskul kaba rim.
“Ngi lied bad pynpra noh ïa kane ka skul bad ngi la bthah ïa ki paidbah ba kim dei ban pynmih kano-kano ka huri- hura, ym dei ban ïa thang ïing ïa thang sem bad ha kane ka sngi ba lied ïa ka ïingskul kam shym la don kano-kano ka huri-hura hynrei la lied da kaba suk bad jai-jai wat la na ka liang ki bor district lyngba u District Magistrate ka West Khasi Hills, la pynmih ka hukum katkum ka kyndon 163 jong ka aiñ BNSS 2023 ban khang lad ïa ka jingthmu ban leit pynpra ïa ka ïing skul,” ong u Bah Ulfilas.
