Jowai, K’lyngkot 19
Ka dur jong u Symbud Myntri Rangbah kaba la pynïeng harud jong ka surok kum ka dak jong ka jingpynkhreh bad pdiang ïa ka Meghalaya Games ha Jowai, ka la shah bynthiew da ka umbiah kwai kaba saw haiñ-haiñ.
Ha kaba ïadei bad kane ka jingshah bynthiew umbiah kwai, na ka liang jong ki nongïalam bad ki dkhot jong ka Executive Committee jong ka Dorbar Shnong Pana-liar, Jowai ki la shim ïa ka sienjam ban pynkhuid ïa ki umbiah ha ki dur ki dar ba la pynkhreh na ka bynta ka Meghalaya Games ha Jowai.
Ki nongïalam shnong ka Panaliar ki la shim ïa kane ka sienjam kum ka nuksa ban hikai pynsngewthuh ban don ïa ka akor ka burom ban ym pynjot pynpra ïa kino-kino tiar ba wah ha ki lynti ki syngkieñ kiba ïadei bad ka Meghalaya Games bad kumjuh ïa kiwei kiwei ki prokram Sorkar ne jong ki ‘riewshimet.
Kine ki dur kiba la satah umbiah ki dei kiba la buh na ka bynta ka Meghalaya Games ka ban sdang naduh ka 20 haduh 25 tarik Kyllalyngkot ha Jowai bad Wahïajer.
