Shillong, K’lyngkot 20
U Bah Auguster Jyrwa uba dei u kyrtong ka United Democratic Party (UDP) ban aireng ha ka ilekshon MDC sha ka Khasi Hills Autonomous District Council (KHADC) na ka Jaïaw-Mawprem Konstitwensi, u la ong ba kum ki trai dukan, ki Dorbar Shnong bad khamtam eh ka District Council ki dei ban shimkhia ha ka ban khanglad ban ai ïa ki NOC bad ban nym ai satia ïa ki Trading License (laisen khaïi) sha ki bar jylla lada ki ïohi ba ki paradoh-parasnam ki la lah ban trei ïa kano-kano ka jait kam khnang ba kane kan wanrah jingmyntoi ïa ki paradoh-parasnam.
U Bah Auguster u la ong ba kum ki Dorbar Shnong ki dei ban khanglad shisyndon ïa kane ka jingai NOC sha ki bar jylla khnang ba ka District Council kan lah ban khanglad pat ïa ka jingai Trading License bad ong ruh ba lada u wan ha ka thong jong ka jingjop ha kane ka ilekshon, ka Trading License kan long ka mat kaba hakhmat duh ba un shim khia.
“Kata ka dei ka nongrim kaba ngi hap ban bat bad kata ka dei ka nongrim kaba ngi don. Lada ki paradoh-parasnam jong ngi bad ki khun samla kiba don katne ki kyrduh kam-kyrduh jam, lada kiba bun ki la nang ha ka ban leh ïa ka khaïi-ka pateng bad ban trei ïa ki jait kam, ka lah dei ïa ngi ba ngin nym dei shuh ban ailad ïa ki ban ai ïa ka Trading License”, ong u Bah Auguster.
Haba kylli ha ka jingïohi bad sakhi jong u kum u kyrtong u ban aireng ha kane ka MDC ilekshon, kiei ki jingdkoh treikam kiba u ïohi kiba don hapoh ka District Council bad ba lada u don ha ka bor un leh kumno ban weng ïa ki, u Bah Auguster u la ong ba kaei kaba donkam hapoh ka Council ka long ban trei hok, synshar hok bad ban leh khuid ïa kano-kano ka kam.
“Shibun ki jingduna bad ki jingdkoh ki don hapoh ka District Council hynrei kawei ka long ba lada ngi shaniah, ngi tip bad ngi shakri ïa u Blei ha kano-kano ka bynta kaba ngi don, ngi donkam ban trei hok bad leh hok ïa ka kam bad kata ka dei ka nongrim kaba nga angnud lada nga poi sha ka thong ban shakri hok na ka bynta ka jaidbynriew bad ki jingduna baroh hangta ki lah ïa ka ban pynbha biang sa shisien ïa ka District Council”, ong u Bah Auguster. Haba kylli hato u sngewïahap ïa ka jingmih ka jingong ba ka District Council ka la duhnoh ïa ka bor bad ka iktiar jong ka ha kaba ki kam-ki jam kiba ka dei ban leh ka la shah tuklar ha ka Sorkar Jylla, u Bah Auguster u la ong ba ka jingduhbor ka jong ka Council ka dei namar ka jingdon ïa ka Para 12 A kaba la ktah bha ïa ka District Council namar la sngewthuh ba ka Aiñ kaba la thaw da ka District Council bad ka Aiñ kaba don jong ka Sorkar Jylla, ka kham khlaiñ bor jong ka Sorkar Jylla bad kaba la pynïap noh ïa ka District Council.
“Ngi donkam ban weng ïa kane ka Para 12 A khnang ban pynkhlaiñ bor ïa ka District Council ha ka ban thaw ïa ki Aiñ”, bynrap u Bah Auguster.
