Tura, Nailur 21
Kum ka lad ban kyntiew ïa ka jingsumar ïa ki Kmie bad ki Khunlung ha ri-lum Garo, u Myntri Rangbah Conrad K Sangma ha ka sngi Nyngkong, u la plie paidbah ïa ka Annex Building ba dang shu dep shna thymmai ba 50 jingthiah hapoh ka District Maternity & Child Hospital (DMCH), Tura.
Ha kane ka prokram la ïashimbynta da u Sampath Kumar, IAS, Additional Chief Secre-tary ka Sorkar Jylla, u Vibhor Aggarwal, IAS, Deputy Commissioner ka West Garo Hills, ki heh ophisar ka tnad ka Koit ka Khiah, ki Doktor bad kiwei ki kynrem ki lyndan. Kane ka jingtei ba thymmai la khmih lynti ba kan nang pynkhlain ïa ka jinglah ban ai ïa ka jingsumar kaba kham bha ïa ki Kmie bad ki Khunlung hapoh ka hospital. Kan ïarap ban pynjanai ïa ka jingsumar ïa ki nongpang, pynduna ïa ka jingkhapngiah ha ka jingdon ki nongpang bad pynthikna ïa ki lad ai jingsumar ba kham bha na ka bynta ki Kmie bad ki Khunlung khynnah ha ka thaiñ.
Ha kane ka jingïalang, u Myntri Rangbah u la pyllait bad sam ruh ïa ki Mother & Child Care Kits sha ki nongïoh bynta kiba shah sumar hapoh ka hospital.
Haba ai jingkren, u Myntri Rangbah u la ai khublei ïa ka tnad ka Koit ka Khiah bad ban jur ba ka jingïada ïa ka jingim ka dei ka jingkitkhlieh lang jong baroh. U la ïathuh ba naduh u 2018, ka Sorkar kala buh hakhmat eh sha ka kam shakri ïa ka imlang sahlang, naduh ka koit ka khiah, ka pule dangle bad ka bhah ka miat ka imlang sahlang kaba kot ïa shibynta na ka saw bynta jong ka mang tyngka ka Jylla. Tang ka pule puthi marwei, u ong, kala ïoh ïa ka mang tyngka ba kot T.3000-T.3500 klur shisnem.
U la ban jur ïa ka jingkongsan ban pyndonkam bha ïa ki jingdon jingem, haba pynpaw ba ka roi ka par kam dei eh tang halor ka jingpynlut ïa ka pisa hynrei ban pynthikna ba ki jingpynlut kin ai ïa ki jingmih kiba lah ban thew. Haba shim ïa ka koit ka khiah bad ka pule dangle kum ka mat kaba bun jyrwit jyrwat bha, u la ong ba ka jingkynshew ha kine ki kam ka ju shimpor hapdeng san haduh shiphew snem ban ïohi ïa u soh.
Haba kren halor ki jingjop ka Jylla, u Conrad u la ong ba ka Meghalaya kala ïohi ïa ka jinghiar kaba bun eh ha ka jingïap ki Kmie ba kha khun hapoh ka Ri, kaba kot haduh 55% ka jinghiar. Hynrei, u la ban jur ba ka thong kaba khatduh hi ka dei ban long nod ka jingïap ki Kmie bad ki Khunlung.
U Myntri Rangbah u la pynpaw ruh ba ka Mother & Child Health Model ka Jylla kala ïoh ïa ka jingithuh hapoh ka ri bad pyntip ba u la shah khot ban ai ka jingbatai ïa kane ka rukom treikam hakhmat u Myntri Rangbahduh ka ri, kaba long ka khyllipmat kaba sngew sarong ïa ka Jylla.
U la bynrap ba ki dang don bun ki projek ka koit ka khiah kiba dang pynkhreh mynta hapoh ka PM-DevINE scheme nalor ka jingthmu ban nang pynheh ïa ka Mother & Child Hospital.
Kiwei pat kiba la ai jingkren ki kynthup ïa u Sampath Kumar, Dr. P. Chyne, Director of Health Services (MCH & FW), kiba la pynpaw ïa ka jingsngewnguh ïa u Myntri Rangbah namar ka jingkyrshan ba khlem sangeh bad ka jingkut jingmut ban nang pynkhlain ïa ka jingshakri ha ka koit ka khiah ha Meghalaya.
