Shillong, Nailur 21
U MLA ka Nongkrem u Bah Ardent Miller Basaiawmoit, u ong “Aiu ka Bharatiya Janata Party (BJP), ka kwah ïoh na ka Jylla Meghalaya, haba kular ban pynurlong ïa ki mat jingdawa, lada ki MLA kin pynïasoh bad ka BJP”.
“Kane kaba ngi hap ban ïa sngap, ba kaei ba ka BJP ka kwah ban ïoh na Meghalaya, kaba kloi ban peiñ lane ban ai ïa kita ki mat jingdawa,” la ong u Bah Ardent haba kren sha ki lad pathai halor ka jingthmu rung BJP ki katto katne ngut ki MLA.
U la ong ba haduh katno kata ka mat jingdawa ka ban pynmyntoi shisha ïa ka lashai la shi sngi, ki longdien mandien jong ngi.
Ka BJP, balei ka kwah ban synshar ïa ka Jylla Meghalaya, bad phi mutdur ba lada ka BJP kam ïoh ei-ei na ka Meghalaya, kam don thong eiei na Meghalaya kaba kham myntoi ïa ka, hato kan ai kita ki mat jingdawa. Kumta ka shong ha u paidbah mynta ba un bishar bad ban pynshong nongrim, u la ong.
U Bah Ardent u la ong ruh ba ngin nym ïakren tang ïa kata ba ka party BJP kan ai hynrei ka Jylla Meghalaya kadei kaba la kyrkhu U Blei bad kaba la bun ki paid Khristan, kumta ngin hap ban peit ha sha lyndet kata, aiu ka BJP ka kwah na Meghalaya.
“Ka Jylla Meghalaya, kadei ka Jylla kaba la bun paid ki Khristan, bad hato kamdei ka jingshisha ba ka BJP kadei ka political front jong ka RSS. Kane kadei kaba nga la dep wad jingtip. Ka jingïohi jong nga ka long, ba ka Sorkar BJP ba synshar ïa ka ri India kam sngewpher than ban ai ïa ki katto katne ki jingdawa, namar kan hap ïoh bun makna na ka Jylla Meghalaya,” la bynrap u Bah Ardent.
Namarkata, u Bah Ardent u la kren shai da kaba ong, ba ka shong ha ki paidbah ba kin bishar, ban jied ïa u nongmihkhmat namar kam dei ba ka VPP kan bishar ïa ka UDP ne ka UDP ïa ka VPP bad kumta ter ter.
