Jowai, Nailur 21
Ka Dorbar Shnong Mukroh Pyllun kala ujor sha u ophisar In-charge (IC) Barato Police Outpost, West Jaiñtia Hills District ban pan jingpynshai halor ka jingrung beaiñ ka kynhun pulit Assam kiba ïaid kjat shaduh ka jaka kaba tip kum ka Phlong kaba hap hapoh ka shnong Mukroh.
Ha ka ujor ba la soi da u Waheh Shnong Ma Kitlang Maskut bad Secretary Shnong Ma Preciousstar Sten kila pyntip ba ha ka 21 tarik Nailur ha ka por kumba 12.45 baje nohphai sngi palat 20 ngut ki pulit jong ka Assam kila rung haduh ka jaka ba ju khot Phlong kaba dang hap hapoh ka shnong Mukroh khlem kano kano ka jingpyntip sha ka Dorbar Shnong Mukroh ne sha ki Pulit ka Meghalaya kiba don ha Mukroh.
Ka Dorbar Shnong Mukroh kala pyntip ba kine ki Pulit Assam kila ïaid kjat ha shilynter ka surok NEC bad sha surok shnong naduh Lumthidow shaduh ka Phlong ryngkat ki uniform bad tiar ïaleh bad la synranlang ïa ki da ki katto katne ki nonglum khubor bad nongringdur kiba ringdur ïa ka jingïaid jong ki pulit Assam ha ka shnong Mukroh.
Kane ka jingleh jong ki Pulit Assam ka la wanrah ïa ka jingsyier, ka jingkulmar jingmut bad buh ki jingkylli hapdeng ki nongshong shnong jong ka Mukroh, la ki pulit ka Barato Outpost ki don kano kano ka jingtip lypa halor kane ka jingwan, bad ka jingïaid kjat jong ki Pulit Assam hapoh Shnong Mukroh? Lada em, balei ym shym la pyntip sha ka dorbar shnong bad ki trai shnong?.
Ka dorbar shnong kala ong, ba ka Shnong Mukroh ka dei ka bynta jong ka Meghalaya bad ka hap hapoh ka jingkhmih jong ka Barato Police Outpost, Laskein Block, West Jaiñtia Hills District. Kumno ki pulit Assam ki lah ban wan rung shapoh u pud u sam jong ka dorbar shnong khlem ka jingïoh jingbit bad khlem da bud ïa ki kyndon.
Ka dorbar shnong kala buh jingkylli, hato u In-charge jong ka Border outpost kaba don ha Mukroh bad ki pulit ka Meghalaya ki don ha Lumthidow, Shnong Mukroh, ki don jingtip ne em ïa ka jingwan rung ki pulit ka Assam kiba ïaid beit na khmat jong kine ki artylli ki ktem pulit shaduh Phlong.
Ka Dorbar Shnong ka la buh jingkylli balei ym shym la khanglad ïa ki pulit ka Assam, bad kaei ka jingthmu jong kane ka jingïaid kjat jong ki Pulit Assam ryngkat bad ki lad pathai khubor hapoh ka jylla Meghalaya? Hato ka dei ban pynmih jingtieng ïa ki nongshong shnong ne ban dawa ïa ka jaka?.
