Shillong, Nailur 21
U Chief Executive Member (CEM) ka Khasi Hills Autonomous District Council (KHA DC) u Bah Winston Tony Lyngdoh haba ïakren halor ka jingpynkylla ïa ka Rule 128 bad 129, u ïathuh ba ka KHADC ka dang peit bniah haba ïadei bad kane amendment ïa ka Rule 128 jong ka Assam bad Meghalaya Autono-mous Districts (Constitu -tion of District Councils) Rules, 1951.
Haba phai halor kane ka mat ka Garo Hills Autonomous District Council (GHADC) ha u Nailar, ka la mynjur ïa ka amendment jong ka Rule 128 bad 129, kaba plie lynti ban don la ka jong ka electoral roll, kaba kyrpang na ka bynta ka ilekshon ha District Council.
Na ka liang u Chief Executive Member Ka KHADC u Bah Winston Tony Lyngdoh u la ïathuh ba kane ka jingpynkylla ne ka amendment kaba ki don jingthmu ka dei kaba ïadei bad ka jingleh jong ka GHADC, hynrei ka KHADC kan ym bud shuh ïa kaei kaba ka GHADC ka la leh.
U Bah Winston u la ong, ba ka council ka kwah ban leh da ka jingbishar hi bad shim ruh ïa kaei kaba bha tam na ka bynta ka KHADC.
U la ong ruh ba ka jingpeit bniah halor kane ka dang ïaid shakhmat, kiei kiba ngin lah ban pynkylla, bad ïa kane mynta ka dang don ha ka Law Department jong ka KHADC ban peit bniah.
Shuh shuh u la ïathuh ba ïa kane mynta, ka komiti kaba ki la thaw da ka EC ha ryngkat ka Law Department bad u nongïasaid aiñ ka Council na Delhi, ki dang peit halor kane khamtam haba ïadei bad ka aiñ.
U Bah Winston u la ong ba ka KHADC kan ym peit ïa baroh ka Autonomous District Rules, hynrei kaei kaba kin phai khmat bad kaba donkam tam kadei ïa ka amendment jong ka Rule 128.
U la ïathuh ruh ba ka Council ka la ïoh ïa ka jingai jingmut na Governor’s Secretariat bad na ka District Council Affairs Department hashuwa ban shim ïa ka rai halor kine ki jingai jingmut ban pynkylla.
