Shillong, Nailur 21
Ha ka sngi Nyngkong uwei u samla u la ngam jyllop ha kawei ka pung kaba don ha ka thaiñ Mawdiangdiang bad tang hapoh shi kynta, ki briew jong ka State Disaster Response Force ki la ïoh ban sei noh ïa ka met hadien ba la ïoh jingtip.
Katkum ka khubor la ong ba kane ka jingjia ngam jyllop ka la jia ha ka por kumba 12 baje mynsngi, kaba la jia ha kawei na ki pung jong ka jaka ki riew shimet ha Mawdiangdiang.
Na ka liang jong ka DDMA, East Khasi Hills ka la pyntip sha ka 1st SDRF Battalion, Shillong ha ka por kumba 2:24 mynsngi ïa kane ka jingjia.
Ka kynhun hapoh ka jingïalam jong u Inspector S Dkhar ki la her mar mar na CD & HG Complex bad poi ha kane ka jaka ha ka por 2:35 mynsngi.
Ïa ka met jong une u samla la lap bad ïoh sei noh ha ka por 3 baje mynsngi ha ka jingïadon lang jong ki pulit ka Mawdiangdiang OP bad u rangbah shnong, bad ïa ka met la aiti noh ban leh ïa ka ‘inquest’ bad kiwei ki jingdonkam, la pyntip u Senior Staff Officer & PRO jong ka Civil Defence & Home Guards Bah PH Shylla.
