Shillong, Nailur 21
Ki pulit ka Anti-Narcotics Task Force (ANTF) ka jylla ki la ïoh ban kurup noh ïa u drok heroin uba khia kumba 40.12 gram bad uba shongdor kumba T.7 lak bad ha kaba la kem noh ïa ki ar ngut ki briew na Pynthorumkhrah ha Shillong.
U Superintendent of Police ka ANTF u Vikash Kumar ha ka sngi Nyngkong u la ong ba ka jingïoh kurup ka la long hadien ka jingïoh ïa ka jingtip kaba bniah ba ka don ka jingshalan ïa une u jingdih buaid na Silchar, Assam sha Shillong.
“Hadien ka jingïoh ïa ka jingtip kaba bniah, ka ANTF ka la phah da ki briew jong ka ha ki jaka kiba la pynkhreh. Ha ka por jong ka jingtalasi, kawei ka kali kaba don ïa u registration number ML05-AD-1301 la ïoh bat noh ha Pynthorumkhrah,” la ong u Kumar ha ka kyrwoh khubor.
U la ong ba ki ar ngut ki briew kiba don hapoh ka kali ki dei kiba la tip kyrteng kum u Jamir Hussain Laskar, uba na Cachar, Assam bad u Joy Ryntathiang, uba na Umkdait, Nongmensong, Shillong.
“Hadien ba ngi la pynlong ïa ka jingtalasi katkum ki kyndon aiñ, la lap saw tylli ki synduk thep sabon kiba la thep ïa u suba heroin napoh ka kali. Haba la pynlong ka jingleh tes, la pynthikna ba u dei u heroin uba don ka jingkhia kaba 40.12 gram, uba shongdor kumba T.7 lak ha ki ïew die drok,” la ong u SP.
Ïa une u drok la kurup noh bad ïa kine baroh ar ngut ki briew la kem noh hadien ba la dep ban pyndep lut baroh ki jingdonkam hapoh ka NDPS Act, 1985, u la ong.
Shuh shuh u Kumar u la ong ba ka jingtohkit ka la ïaid shakhmat ban lap pat ïa ka tynrai jong une u drok bad ka jaka ba la thmu ban pynpoi bad ruh ban ithuh ïa kiwei pat ki kynhun kiba donkti ha kane ka kam.
