Shillong, K’lyngkot 20
U National Secretary bad National Spokesperson ka BJP, uba khmih ruh ïa ka Jylla, u Anil Antony u la ong ba ka jingïatehlok hapdeng ka BJP bad National People’s Party (NPP) hapoh ka Jylla ka long kaba khlaiñ.
“Ka NPP ka long ka lok kaba donkam jong ka NDA, ha kiba bun ki Jylla ngi don ka jingïatehlok bad hangne, ka BJP bad ka NPP ki don hapdeng ka jingïatehlok kaba khlaiñ,” ong u Antony haba kren sha ki lad pathai khubor ha ka Lah Sngi U Blei.
U la ong ruh ba kine ar seng ki ïatreilang ban pynïaid shakhmat ïa ka thong jong u Myntri Rangbahduh ka ri, u Narendra Modi hapoh ka Thaiñ Shatei Lam Mihngi.
Haba kylli, une u nongïalam u la ong, “Ïa u President la thung shisnem shiteng mynshuwa bad ha kine ki shisnem shiteng, u President u la trei bun bah ki kam hapoh ka Jylla. Ka jingkiew ha ka jingdon jong ki ‘Booth’ ka la kiew da lai shah hapoh ka jingïalam jong u.”
U la pynpaw ruh ka jingkyrmen skhem ba ha kine lai snem ban wan hapoh ka jingïalam jong u, yn sa ïohi ïa ka jingdon jong ka seng ha man la ki ‘Mandal’ bad ‘Booth’ ha kylleng ka Jylla.
“Ha ka ilekshon ban wan sha ka Ïingdorbar Thawaiñ ka Jylla, ngin sa leh bha, ban kan nang bha shuh-shuh nalor kine ar ngut ki MLA kiba ngi don mynta,” u la ong.
Haba jubab, u Antony u la pynkynmaw biang ba hynñiew snem mynshuwa hapoh ka Thaiñ Shatei Lam Mihngi, ka BJP kam shym la synshar wat ha kawei ruh ka Jylla, hynrei mynta, ka seng ka don ïa ka jingbun paid ha saw na ki phra tylli ki Jylla hapoh ka thaiñ, katba ha lai tylli kiwei pat ba kynthup ïa ka Meghalaya, Nagaland bad Sikkim ka seng ka don bynta lang ha ka Sorkar.
“Hangne ruh ka seng ka la kiew, bad ngin sa ïohi shisien ka sngi ba ka seng kan long kaba hakhmat eh ha ka Jylla,” u la ong.
