Shillong, K’lyngkot 20
U Bah Kitborlang Mukhim uba dei u Acting Sordar ka Mawkynrew Pyllun, u la pynshai ba kam shym la don satia kano-kano ka jingleh donbor hynrei ka jingai jaka ka dei kaba la dep ban ïasyllok shwa ban ai.
Haba kren sha ki lad pathai khubor ha kaba ïadei bad ka jingshah kynnoh ha ki rangbah jong ki ar shnong kata ka shnong Mawkynrew bad Mawleiñ kaba la kynnoh ba u la leh donbor da u Acting Sordar ban ai ïa ka jaka shnong ban shna ïa ka skul Ram Krishna.
Ki nongïalam na ki ar tylli ki shnong ha ryngkat ki paidbah nongshong shnong ha ka 20 tarik u Kyllalyngkot 2025 ki la leit tur sha katei ka jaka ban leit khang ïa ka jingpyntrei ïa ka skul Ram Krishna ha Umjiar kaba dang hap hapoh Mawkynrew kaba la ïaid shaid-shaid shakhmat.
U Bah Kitborlang u la ong ba kam don kum kata kaba kine kiba pyrshah ki la kynnoh namar ha shwa ban ai ïa katei ka jaka sha ka Ram Krishna Mission ka la don da ka dorbar bad ha u snem 2021, ha kaba ka shnong Mawleiñ ruh ka la ai ïa kane ka jaka sha ka Ram Krishna Mission ban tei skul hynrei ym la ai sha kano-kano ka club ym ïa ka Mawleiñ Football Club ne sha ka Mawkynrew FC.
U la ong ruh ba lada dei ki briew kiba sngewthuh ki la dei ban pyrkhat da kawei ka lynti ym dei ba wan da u paidbah ban ïalum ban ïa pyrshah ïa kane ka jaka lane ban phah sangeh bad phah khang ïa ka skul namar kane ka skul ka wan khnang da ka jingmynjur na ka bynta ka jingmyntoi ki khun ki kti bad ka dong ka thaiñ.
Shuh-shuh, u Bah Kitborlang u la ong ba ka dorbar ka la bthah ha u snem 2021 ba ka Ram Krishna Mission kan sdang noh ban tei ïa ka skul bad u Bah Tanborlang Surong, President ka Mawkynrew Club uba pyrshah mynta bad u dei ma u hi uba saiñ bad mynjur ban pyntreikam ha kato ka por ïa kane ka skul.
