Shillong, K’lyngkot 20
Ka jingïakynad kaba jur ka la mih ha ka Lah Sngi U Blei ha Madan Umjar kaba hap hapoh ka Mawkynrew Block, namar ka jingpyrshah jong ki paidbah ban wanrah ïa ka skul jong ka Ram Krishna Mission. Kane ka jingïakynad ka la mih hapdeng ki paidbah bad ki bor pulit haduh u pud ba ki la ïakhru, kaba la pynlong syndon ïa ki pulit ban khyrwit da ki lathi bad siat da ki tyndong lyer pynsat khmat ban pynpra ïa ki paidbah.
Ha kane ka jingïakynad la don ruh ka jingmynsaw ba malu-mala ïa ki ‘riew paidbah bad kumjuh ïa ki pulit, kaba la pynlong syndon ïa ka Deputy Commissioner jong ka East Khasi Hills ban pynjari da ka korphiw ha ka thaiñ baroh kawei.
Ki paidbah kiba la mih ban pyrshah ïa kane ka jingai jaka ki dei na ka shnong Mawleiñ bad Mawkynrew. Ki paidbah kynthei bad shynrang ki la mih ban pyrshah ïa kane ka kam da kaba thmu bad sieh dieng kol ha madan Umjar, ka jaka ba pynïeng ïa ka ïing skul.
Ha shwa ka jingshah kawang da ki tyndong lyer pynsat khmat bad shah bom lathi, ki paidbah ki la rah ïa ki dieng kol ryngkat ki mohkhiew, lyngka ban leit thung ha katei ka madan Umjar, nalor ki plakad ban pyrshah ïa ka jingïoh jaka ka Ram Krishna Mission ban tei skul.
Na ka liang ki paidbah ba pyrshah ki la pynpaw ba ïa katei ka madan la dep aiti sha ka Mawkynrew Sports Club ban pyndonkam, kumta ki la kynnoh ba ka jingai jaka sha ka Ram Krishna Mission ka long kaba sop-sop da ka jingtip jong katto-katne kiba donkti.
Ha katei ka jingleit pyrshah ki paidbah ki la ïatyngkhuh bad ki bor pulit lem bad majistor ha lynti ban leit rung sha katei jaka. Dei ha kum kane ka por ba ki paidbah ki la thom da ka bor ïa ki pulit, kaba la pynlong pat ïa ki pulit ban jubab da kaba bom lathi ïa ki, bad siat ruh da ki tyndong lyer pynsat khmat ban pynpra ïa ka jingwan tur ki paidbah.
Wat hadien ba ka la don ka jingïakhun bad ki bor pulit, ki paidbah kim shym la randien haduh ban da ïoh sieh ïa ki dieng kol ha katei ka madan.
Halor kane ka jingmih ban pyrshah ki paidbah, na ka liang u Sordar barim ka Mawleiñ, Bah P Wankhar, u la ïathuh ba ha u snem 2013 ki ar Dorbar Shnong jong ka Mawkynrew bad Mawleiñ ki la dep ban aiti ïa kane ka jaka sha ka Mawkynrew Sport Club, hynrei na ka liang u Acting Sordar bad ki briew jong u ki la ai ïa kane ka jaka sha ka Ram Krishna Mission khlem ka jingtip ki nongshong shnong.
U Bah Wankhar u la kam ba ka jingtur ki paidbah ka long da ka jingjai-jai ban pyrshah halor ka jingai jaka sop-sop u Acting Sordar ym ban thaw kano-kano ka jingkulmar.
“Kane ka dei ka jaka jong ar tylli ki Dorbar Shnong, ka Mawkynrew bad Mawleiñ bad ka jingpyrshah ka dei hi halor ka jingthmu u Acting Sordar ban pynduh ïa ka rai jong ki ar dorbar ha u snem 2013. Ngi kwah ba kan neh beit kumjuh khnang ba kan pynbha ban kyntiew ïa ki khun samla ka dong ka thaiñ”, la ong u Bah Wankhar.
Namar kane ka jingjia, ka Deputy Commissioner jong ka East Khasi Hills District, ka la pynbna mardor ba la pynjari da ka korphiw ha ka shnong Mawkynrew ban teh lakam ïa kino-kino ki jingjia ba lah ban ktah ïa ka suk ka saiñ ha ka thaiñ.
Kat kum ka hukum, ka Deputy Commissioner ka pyntip ba ka la mih ka jingthut ha ka shongsuk-shongsaiñ ha ki shnong bad ka la don ruh ka jingpynpra ïa ki nongkynti jong ka Ram Krishna Mission ha Mawkynrew.
