U Khasi um ju ïa tylli ne ïa long kawei namar u don ki jingngeit ba ïapher. Namar kine ki mat harum ki pyni shai ïa ka rukom im u Khasi naduh ki por ba la leit. Balei um don jingïatylli ? Hato ka don kaei kaei kaba bakla ha ka imlang ka sahlang u Khasi ? Ka don ka jingong haba ïa dei bad kane ka rukom ba ngi ki Khasi, kata u Khynriam, u Pnar, u Bhoi bad u War ngim don ka riti ka dustur kaba ïahap lang na ka imlang ka sahlang. Namar ha ka saiñ hima sima u Khasi um ju ïa tylli u la pait ïa pra. Haba la dei ka rukom ïa sam ïa ka nongmei nongpa ruh um ju ai bhah mar katjuh ïa ki khun ki kti. Ha ka kheiñ kur kheiñ jait ruh don kiba ai jait shim jait na ka kmie bad don kiba shim jait ruh don kiba ai jait shim jait na ka kmie bad don kiba shim jait kheiñ jait na u kpa. Bad don de kiba bud ïa ka jait ka khong kiwei bad kiba shu tang jait thymmai. Haba ïa dei bad ka rukom bat khyndew bat shyiap ruh don kiba ai bhah tang ha ka khun khatduh. Don de kiba ai bhah lang bad khun kynthei bad khun shynrang. Don kiba ai bhah tang ïa ki khun kynthei. U Khasi u phiah ïa ka khyndew kur, ka khyndew hima ka khyndew syiem bad ka khyndew sorkar. Ka rukom ai bynta ïa ka nongmei nongpa ka ïapher na kawei ka thaiñ na kawei pat. Ha ka jingngeit niam don kiba dang bat ïa ka niam tynrai ba la buh u longshuwa u manshuwa. Ki don kiba la bud noh ïa ka jinghikai ka niam khristan, ki don kiba bud ïa ka jinghikai ka niam Muslim bad kiwei kiwei ki jingngeit. Ki don ki bym ju bud ïa kano kano ka niam ruh. Ha ka shongkha shongman ruh u Khasi u ia shongkha katba lap ba shem, u ïa shongkha khleh bad baroh ki jaitbynriew ka pyrthei. Um ju bat hok ïa ka dustur la jong, u kham sngewtynnad ban bud ïa ka rukom im bad leh jong kiwei kiwei ki jaitbynriew, ha kaba bun rukom. U Khasi u don ki kur ki jait (clan) kumba don kiwei ki jaitbynriew. Um ju da ïapher than eh na kiwei ki jaitbynriew. U don ki Kñi, u don ki Pakha, ki Meikha, u don ki khun ksiew ki ksiew jlap U don ka jingsngew kyrpang ïa la ka jong ka thaiñ kaba u shong u sah. Baroh kine kiei kiei ki pyni bad pynpaw ba u Khasi um don ka jingïatylli naduh ïing i Mei i Pa bad kumjuh ha ka imlang ka sahlang. Kane ka long ka jingiohi jongnga kaba ïa dei bad ka jaitbynriew Hynñiewtrep Hynñiewskum.
C. B. Iawphniaw
