Shillong, K’lyngkot 20
U Superintendent of Police jong ka East Khasi Hills, Bah Vivek Syiem, u la ïathuh ba 6 ngut ki briew ki la mynsaw, kynthup 4 ngut ki pulit kynthei bad 2 ngut ‘riew paidbah ha ka jingïakynad kaba la mih ha ka shnong Mawkynrew ha ka step jong ka Lah Sngi U Blei.
U la ïathuh ruh ba hadien ba la pynjari ïa ka korphiw ha ka thaiñ baroh kawei, la phah shuh-shuh sa kumba 30 ngut ki pulit ban pahara ha katei ka thaiñ, nalor ki pulit kiba la leit lypa sha katei ka jaka naduh ka por mynstep bad ka jingïaid pahara.
U la ong ba ki pulit kin sa pynrung mukotduma ïa ki nongïalam ban pyrshah ïa ka jingtei ïa ka skul Ram Krishna Mission ha Mawkynrew, bad bynrap ba hadien ba la mudui ïa ka ejahar yn sa shim kam ïa ki briew ba donkti katkum ka aiñ.
“Ngin sa register da ka case pyrshah ïa ki nongïalam kiba kynshoit ban ïalum paidbah ban tur leit pynpra ïa ka skul. Hadien ba la mudui ïa ka ejahar yn sa shim kam katkum ka aiñ,” u la ong.
Katkum ka jingïathuh u Bah Vivek, u la ong ba hynnin ka sngi ki pulit ki la ïoh jingtip ba ka executive committee jong ka shnong ka la khot ïa ka jingïalang, bad ha katei ka jingïalang la wer ïa ki paidbah ban mih ha ka step Lah Sngi U Blei naduh ka por 9 baje ban pyrshah ïa ka skul kaba dang tei.
“Ka kynhun ki pulit ka la leit sha katei ka jaka naduh ka por mynstep, ki la khang ïa ka kynhun kaba don kumba 250 ngut kiba thmu ban tur sha ka jaka ba shna ïa ka skul. Ka la don ka jingïakynad malu-mala bad ka la don ka jingmynsaw malu-mala ruh ïa 4 ngut ki pulit kynthei bad 2 ngut ki ‘riew paidbah”, la ïathuh u SP.
U la ong ba namar katei ka jingïaleh pyrshah, ki pulit ki la hap ban khyrwit lathi ruh malu-mala ban khanglad ïa ka jingthmu leit tur sha ka jaka ba shna ïa ka skul, bad la hap ban kawang ruh da ki tyndong lyer pynsat khmat.
U Bah Vivek u la ong ruh ba ym lah ban sngewthuh kaei ka jingmut ba ki paidbah ki thmu ban leit pynpra ïa ka jingtei ïa ka skul da kaba thmu ban leit sieh ïa ki dieng kol ha katei ka madan, namar ka kam ba ïadei bad ka jinglong trai ïa katei ka jaka ka dang don hapoh ka ïingbishar.
U la ong ba ha ka jingshisha ka la don ka jingïasoi soskular ban ai ïa ka jaka da ka Mawkynrew bad ka Mawleiñ, hynrei mynta pat ki pyrshah ban ai ïa ka jaka sha ka Ram Krishna Mission.
