Shillong, K’lyngkot 20
Ka jingshna ïa ka surok thymmai na Mawlai Bypass kaba ïasoh bad ka Shillong Bypass ha Umroi yn pyndep noh mynta u snem lada ki kam ki ïaid beit kumba ka long.
Kane ka surok kan long ka jingmyntoi ïa ki paidbah nongleit nongwan bad ki kali kiba kit jingkit khia kum ki trok bad ki bos kiba khlem lah shuh ban wan sha Shillong lyngba ka jingkieng Umïam kin ïohlad ban ïaid lyngba kane ka surok kaba thymmai.
Kane ka surok kaba jrong kumba 14 km, ka dei kaba la maitphang da u MDC ka Mawlai u Bah Teiborlang Pathaw ha u snem 2020.
Ka jingshna ïa kane ka surok ka la ïaid shaid-shaid naduh u snem 2023 bad ka jingpyntrei ka la ïaid kumba 80 na ka 100. La ong ba yn pyrshang ban pyndep noh ïa kane ka surok mynta hi u snem.
Kane ka surok ka sdang na Mawlai Bypass bad ka ïaid lyngba ka shnong Umsaw Mawjynrong ter ter sha Umpling-Umjathang shaduh Madan Nonglakhiat bad ka ïasoh bad ka surokbah Shillong Bypass ha Umroi.
Na ka liang ka Sorkar Jylla ka la shim ki lad ban pynsted ïa ka jingshna ïa kane ka surok khnang ba ki kali kiba heh kin ïoh ban wan sha Shillong lyngba kane ka surok thymmai kaba kham jan.
Lyngba ka jingleit tynruh bad buddien u Bah Pathaw, ka Sorkar Jylla ka lah ban pynurlong da kaba ïoh ïa ka jingmang pisa hapoh ka North East Special Infrastructure Development Scheme (NESIDS) lyngba ka North Eastern Council (NEC).
Ha u snem 2019, hadien ba u la shahjied kum u MDC, u Bah Pathaw u la pynpaw ka jingsngewkhia namar ka jingjur palat ka dheng kali ha surokbah Shillong-Guwahati khamtam ynda la poi ba ki bynta jong ka Mawlai.
U Bah Pathaw u la kdew ruh ïa ka jingma kaba ap ïa ka jingkieng Umïam namar ka jingbun ki kali kiba rit bad kali heh kiba ïaid lyngba ka jingkieng Umïam.
Kumta ka Sorkar Jylla lyngba ka tnat PWD (Roads) ka la sngew dei ïa ka jingtyrwa ban shna noh da kawei ka surok na Mawlai Bypass lyngba ka shnong Umsaw, Mawjynrong ter ter sha Umjathang, Madan Nonglakhiat bad ka kut ha surokbah Shillong Bypass.
Dang sdang ka don ka jingtyrwa ban shna pynheh ïa ka surok na Mawtawar sha Nongkohlew kaba la don lypa, tangba kane ka kham shem jingeh namar ki don ki bynta kiba kham shitom ban kiew ki kali heh khamtam kiba kit jingkit. Hynrei mynta ïa kane ka surok na Mawtawar sha Nongkohlew la siang rong thymmai noh.
Ynda la dep ban shna ïa ka surok na Mawlai Bypass sha Umroi ki kali heh khamtam eh ki trok kit jingkit ki la lah ban wan kiew sha Shillong bad ki bos kiba ju leit sha kiwei ki jylla kin sa ïoh biang ban leit sha ISBT kaba don ha Mawlai Mawïong.
