Jowai, K’lyngkot 20
Dei lyngba ka jingwan jong ka Meghalaya Games ba ka Jowai, ka nongbah jong ka West Jaiñtia Hills District ka la ïoh ïa ka ‘signage’ ne ka jingthoh ba la thoh ‘I Love Jowai’ ba la pynïeng ha Khliehshnong Chilliangraij, Jowai.
U MLA ka thaiñ Bah Wailadmiki Shylla haba kren sha ki lad pathai khubor ha ka Lah Sngi U Blei u la ong, ha ka jingwan jong u sha Chilliangraij, ki bor pynïaid shnong ki la pynsngew ïa ka jingthrang jingangnud ban pynbha pynmiat ïa kane ka jaka.
Hadien ba u la wan ban jurip ïa kane ka jaka, u MLA u la ong ba u la shim kabu na ka jingwan ka Meghalaya Games bad u la phone sha u Director ka tnat Tourism kumjuh ka District Tourism Officer ba kin leh eiei na bynta ban pynmiat pynbha ïa kane ka jaka.
U la ong ba kane ka Viewpoint, ka jan bha bad ka South Cluster ka jaka ba pynsah ïa ki khynnah na ka bynta ka 6th Meghalaya Games bad ki khynnah kiba wan ha kane ka jaka kin ïohi kyndiang ïa ka shnong Jowai baroh kawei.
“Kane ruh kan dei shibynta ka jingkyrkhu na ka jingwan ka Meghalaya Games”, la ong u MLA da kaba bynrap ba kane kan ym kut tang hangne hynrei ma u ryngkat ki bor pynïaid shnong kin sa shong pyrkhat ban pynbha bad pynbiang shuh-shuh ïa ki jingdonkam ha ki sngi ki por ban wan khnang ba kan long ka jingkyrkhu ïa ka shnong ka thaw.
