Shillong, K’lyngkot 21
U Myntri Rangbah ka Jylla, Conrad K. Sangma ha ka Sngi Ba-ar u la buh ïa u mawnongrim ban tei ïa ka ïing-paki bathymmai jong ka Secretariat ha Umsawli, New Shillong ha ka jingdonlang ki Symbud Myntri Rangbah ka Jylla, Bah Prestone Tynsong, Bah Sniawbha-lang Dhar, ki Myntri Sorkar – Abu Taher Mondal, Kong Ampareen Lyngdoh, Marcuise Marak bad u Bah Comingone Ymbon.
Ïa kane ka Secretariat la tei ha ka jaka kaba heh 53 akar ha ka jinglut kaba la antad ka ban kot sha ka T.1188 klur. Ïa ka Secretariat bad Directorate Campus ha New Shillong yn shna ha ki ar kylla.
Ka ‘Complex’ kan don 68 tylli ki ophis, ka ‘Auditorium’ kaba ngiam 700 ngut ka jingbun briew, ka jaka na ka bynta 1829 ngut ki nongtrei.
Ka kylla ba ar jong ka ‘Complex’ kaba don 1.25 lak sq.m ka jingheh kan don ïa ki Directorate ha ryngkat 56 tylli ki ophis, ka jaka na ka bynta 4746 ngut ki nongtrei, bad 2 tylli ki ‘Auditorium’ kiba lah ban pdiang ïa ka jingbun briew kaba mar 200 ngut.
Ka jingbuh mawnongrim ïa ka Secretariat bathymmai ha ka sngi rakhe ïa ka ‘Statehood Day’ kaba 53, ka pyni ïa ka jingthrang jong ka Sorkar ban pynsted bad pyntyllun ïa ki kam pynroi jong ki jingtei ha ka Jylla.
Haba ai jingkren ha ka jingïalang ha kane ka sngi, u Myntri Rangbah ka Jylla, u Conrad K. Sangma u la ong, “Kam dei tang ka ïing-paki bad ka jingtei ka ban sa jia. Ka dei ka jingpynheh ïa ka sor Shillong.”
Halor ka jingpynwandur ïa ka Secretariat bathymmai, u la ong, “Kane kam dei ka dur-khih kaba la shna na ka AI. Kane ka dei ka jingpynwandur ba shisha jong ka ïing-paki ba shisha ka ban sa ïeng hangne, kaba la shim por ïa ngi palat shi snem ban pyndep,” u la ong.
Haba ñiew ïa ka sor jong ka jingsynshar bad jingnang-jingtip (Administrative and Knowledge City) ka ban sa wan ha New Shillong kum ka “jaka pdeng jong ka jingpynroi”, u la ong, “…katba ngi dang bei tyngka ha kane ka Secretariat, katba ngi dang bei tyngka ha ki surok kiba bun ki ban pynïasoh ïa ka sor kaba la don lypa sha kane ka sor jong ka synshar-khadar bathymmai. Na kane ka sor jong ka jingsynshar sha ka sor thymmai ka jingnang-jingtip, ngi buh ïa ka nongrim na ka bynta ka imlang-sahlang, na ka bynta ki paidbah, na ka bynta ki trai jaka ha kumba 30 sqkm ban pynroi ïa kane ka New Shillong baroh kawei sha ka jaka pdeng ka roi ka par kaba kongsan na ka bynta ka Jylla jong ngi.”
U la pyntip shuh-shuh ba ka jingbei tyngka kaba T.5500 klur la dep ban saiñdur lypa ha ka thaiñ New Shillong da ka Sorkar, kynthup ïa ka jingbei tyngka kaba jan kot T.10,000 klur shuh-shuh ha ka por ban dang wan.
“Kane ka Secretariat kan ym dei tang ka Secretariat. Kane ka Secretariat ka long, ha kawei ka rukom, ka dak kaba ngi kum ka Sorkar bad kum ka Jylla bad kum ki paidbah, ngi nud ban thrang ïa kaba khraw. Ka long ka dak jong ki jingangnud kiba ngi don kum ka imlang-sahlang bad kum ka Jylla bad kum ka Sorkar. Ka dei ka dak jong ka jingkyrmen kaba ngi kwah ban ai sha ki paidbah ka Jylla”, u la bynrap.
“Ki skhim ba kongsan jong ngi na bynta ki samla, nongrep bad ki kynthei ka pyntikna ba ngi kyntiew ïa ka kyrdan im jong ki briew jong ngi. Ïa ka ïoh ka kot baroh kawei jong ka Jylla la ai ïa ka jingkyrmen kaba thymmai kaba pynsted ïa ka jingroi bad jingkiew. Kane ka Sorkar ka trei na ka bynta ka roi ka par baroh kawei jong ka Jylla jong ngi,” la bynrap biang u Myntri Rangbah.
Ha kane ka sngi, u Sangma u la pyllait ruh ïa ka skhim ‘Social Sector’ kaba kot sha ka T.63 klur na ka bynta ki 6000 ngut ki nongïoh jingmyntoi hapoh ka ‘CM Elevate’, ‘Focus’, ‘Green Meghalaya +’ bad ki projek pynroi ba ïadei bad ki kam jngohkai pyrthei.
