Nongpoh, K’lyngkot 21
Ka National Peoples’ Party (NPP) ha Jirang Konstitwensi katba nang mih ki sngi ka la nang ïoh bor bad nang khlaiñ da ka jingwan pynïasoh jong ki nongïalam ba hakhmat ka Congress bad Trinamool Congress ha ka jingïalang kaba la pynlong ha ka janmiet Sngi Ba-ar ha Nongthymmai Byrnihat bad ha 13 Mer Tamulkuchi.
Ïa ki nongïalam ka Congress bad TMC kiba la wan ban pynïasoh sha ka NPP ha kitei ar tylli ki jaka, la pdiang da u Bah Sosthenes Sohtun, MLA ka Jirang Konstitwensi, uba dei ruh u kyrtong MDC jong ka seng na katei ka konstitwensi.
Ha ka jingïalang kaba la pynlong ha Nongthymmai Byrnihat, la pdiang ïa ki nongïalam ka Congress ba kynthup ïa u Abraham Sangma, Adviser ka Jirang Block Congress Committee (JBCC), u Markus Sangma, Vice President ka JBCC, u Bijoy Ronghang, Joint Secretary ka JBCC nalor kiwei kiwei ki nongkitkam bad ki dkhot.
Ha ka jingïalang kaba la pynlong pat ha 13 Mer Tamulkuchi, ki nongïalam ka TMC kiba la wan pynïasoh sha ka NPP, ki kynthup ïa u Jamilson Sangma, President ka TMC Jirang Block ryngkat kiwei kiwei de ki nongkitkam bad ki dkhot nalor ki nongïalam bad nongkyrshan jong ka Congress.
Ha kaba ïadei bad kane, u Bah Sosthenes Sohtun, u la pynpaw ïa ka jingsngewkmen halor ka jingwan pynïasoh NPP da kitei ki nongïalam bad nongkyrshan jong ka Congress bad TMC na ka bynta ka jingthrang bad ka jingangnud ka jong ki ban pynjop donburom ïa ka NPP ha kane ka ilekshon MDC ka ban sa long ha ka 21 tarik jong u bnai Rymphang mynta u snem.
