Nongstoiñ, K’lyngkot 21
Ka Synjuk ki nongkhaïi bad nongtrei maw, shyiap, crusher bad ki kali kamai ki la maham jur ïa ki katto katne ki kompeni shna surok ha ki bynta jong ka West Khasi Hills District kiba pyrshang ban shalan lane die ïa ki maw sha ki ‘riew paidbah hapoh ka thaiñ ha kaba ha ka jingshisha kam dei ka bynta ïa ki ba kin die ïa ki maw sha ki ‘riew paidbah hynrei tang ban pyndonkam na ka bynta ka projek kaba ki trei.
U Secretary ka Synjuk, Bah Mawkordor Kharsyiemlieh ha ka jingdonlang ki trai crusher, trai maw bad ki nongshoh maw nalor kiwei kiwei kiba im sngi ban bylla na kane ka kam, ki la kam ba hadien ba ki la ïoh ïa ka jingtip kaba tikna ba ki kompeni shna surok ha ki bynta jong ka WKH mynta ki la kylla pynban ki nongdie bad shalan maw sha ki ‘riew paidbah hapoh ka thaiñ. Kumta ha ka 21 tarik mynta u bnai ki la leit ban ïakynduh bad katto katne ki nongpynïaid jong kitei ki kompeni kiba buh ïa ka crusher ban tylliat ïa u maw ban pyndonkam ha ki projek kaba ki trei, da kaba ki la buh ïa ka jingmaham ba lada nangne shakhmat kin dang lap kin leh da kaba tyngeh.
U Bah Mawkordor u la ong ba kane ka jingshim kabu jong ki kompeni ban die bad shalan maw pynban sha ki ‘riew paidbah ka la wanrah ka jingduhnong haduh katta katta ïa ki paidbah jong ka thaiñ kiba buh ïa ki crusher kiba im sngi ban bylla shoh maw bad kiwei kiwei.
Shuh shuh u Bah Mawkordor u la ong ba ka jingmaham jong ka Synjuk ïa kine ki kompeni ba kin sangeh ïa katei ka jingleh ka jong ki namar ki kwah ba ki para Khasi kin ïoh kam ïoh bylla ïoh sngi.
U la kyntu ruh ïa ki kontraktor napoh jong ka thaiñ ba kin ïatreilang ban shim beit ïa ki maw ki shyiap na ki para thaiñ khnang ba kin ïa kiew ha ka ïoh ka kot hapoh ka District, namar katei ka jingleh jong ki kompeni, ka jingduhnong kam dei eh tang ïa ki trai crusher ne ïano ïano hynrei khamtam eh ka dei ruh ïa kito kiba shong shoh maw kiba im ban bylla na kane ka kam.
