Shillong, K’lyngkot 21
Ki kor thep vote lane Electronic Voting Machine (EVM) kiba thymmai kumba 2000 tylli ki la wan poi sha kane ka Jylla ki ban sa pyndonkam ha ka ilekshon sha ka Ïingdorbar Khasi Hills Autonomous Dis-trict Council (KHADC) bad Jaiñtia Hills Autonomous District Council (JHADC).
La ïathuh ba ki kor thep vote kiba la thied thymmai na ka kompani Electronics Corporation of India Limited (ECIL) kaba don ha nongbah Hyderabad ki la wan poi sha kane ka Jylla mynshem taïew.
Kan sa don ka jingkhmih bniah ïa kine ki kor thep vote khamtam ban peit ïa ka jingtreikam bha kine ki kor khnang ba ka jingpynlong ïa ka ilekshon kan long kaba ïaid beit ïaid ryntih.
Ka jingthep vote na ka bynta ka ilekshon sha ka Ïingdorbar KHADC bad JHADC kan long ha ka 21 tarik Rymphang bad ka jingñiew vote kan long ha ka 24 tarik Rymphang.
Ka KHADC ka don 1,798 tylli ki jaka thep vote ha baroh 29 tylli ki konstitwensi katba ka JHADC ka don tang 483 tylli ki jaka thep ha baroh 29 tylli ki konstitwensi.
Ki konstitwensi ha KHADC ki long kiba heh bad ïaryngkat bad ki konstitwensi ha ka MLA ilekshon katba ha JHADC ki konstitwensi ki long kiba rit bha bad dei na kane ka daw ba ki jaka thep vote ruh ki kham duna.
