Shillong, K’lyngkot 22
U Myntri Rangbah ka Jylla, Conrad K Sangma u la ong ba ka don ka jingeh ha kaba ïadei bad ka jaka shipai na ka bynta ban pynkynriah ïa ki briew ba sah ha Them Metor, Them Ïew Mawlong.
“Ngi la ïoh ïa ka kynja jubab na ki shipai, hynrei ki don ki kyndon jong ki shipai ha kaba ïadei bad ka khyndew, ki don ki kyndon kiba hap bud katno ka jingjngai ki ïing na ki jingtei jong ki shipai, kumta ter-ter”, u la ong.
U Conrad u la ong ïa kane haba ïathuh ba ha ka jingleit sha Delhi dang shen u la ïakynduh bad u Myntri Ïada Ri, Rajnath Singh ban ïakren halor ka jaka shipai kaba don ha Lum Survey ha lyndet ka Them Ïew Mawlong.
U la ong ba ki don ki kyndon kiba pyrkhing bha ban ïoh shna ïa ki jingtei ha ki sawdong-sawkun ka jaka shipai, bad bynrap ba kita ki jingpyrkhing ki wanrah jingeh ïa ka Sorkar ha kaba ïadei bad kane ka kam.
“Kumta kita ki jingpyrkhing ki wanrah jingeh ïa ngi mynta. Ngi dang pyrshang ha kano ka rukom ban ïaid shakhmat, ngim pat shym la pynkut, ngi la buddien ïa kane ka kam la slem mynta, ngi da kwah ba kane ka kam yn pyndep ha ka rukom kaba dei”, la ong u Myntri Rangbah haba kren bad ki lad pathai khubor ha ka Sngi Balang.
Shuh shuh u la ong ba ka Sorkar kan bishar lut ïa baroh ki lad ba ka lah ban leh, kynthup ka jingïakren bad ki shipai. U la ong ba ka jingïakren bad ki shipai ka dang don, ha kaba u la pynpaw ruh ïa ka jingkyrmen ban don beit ka lad.
“Ngin bishar lut ïa baroh ki lad ba ngi lah ban leh, ngi kyrmen ba kan don kata ka lad, hynrei ïa mynta ka dang kloi palat ban kren eiei than, namar ki kyndon jong ki shipai ki kham kyllaiñ”, u la ong.
U Conrad u la ong ruh ba ki shipai kim don bynta eiei ha kaba ïadei bad kane ka kam.
“Kane ka dei ka khyndew kaba ka Sorkar ka ïohi. Ngi ong balei ngim ïakren bad ki shipai namar ba kim pyndonkam ïa katei ka jaka kaba long ha them. Ngi pyrkhat ban shim ïa kane ka lad ban ïakren bad ki”, u la bynrap shuh shuh.
Katkum ka jingong u Myntri Rangbah, ka Sorkar ka la kyrpad na ki shipai ban ai tang 1 akar lane 1.5 akar ka jaka.
“Ngi pyrkhat ba kane kan dei kawei ka lynti kaba biang ban pynbeit ïa kane ka jingeh. Kawei ka lynti kaba la don lypa ka dang don mynta ruh ym dei ba ngi lah pynduh ïa kata. Ngi hap ban burom ïa ki shipai bad ïa ki kyndon ba ki don, namar ki kyndon ki treikam ha baroh kawei ka ri ym ba pyrkhing tang hangne”, la ong u Conrad.
