Nongpoh, K’lyngkot 22
Kumba long lem ha ka jylla baroh kawei, ka Ri Bhoi District ruh ha ka Sngi Ba-ar ka la pynlong ïa ka prokram kyrpang ha District Library Hall ban rakhe ïa ka jingdap 53 snem ka jingïaid lynti jong ka Meghalaya naduh ba ka ïoh ïa ka jylla ba pura ha ka 21 tarik u Kyllalyngkot, 1972.
Ha kane ka jingrakhe, la wan ban ïadon ryngkat da u Dr Celestine Lyngdoh, MLA jong ka Umsning Konstitwensi kum u kongsan ha ka jingdon ryngkat jong u Abhilash Baranwal, Deputy Commissioner ka Ri Bhoi District, ka Kong Balakyntiew Ranee bad u Raja Brahma kiba dei ki Additional Deputy Commissioner ka Ri Bhoi District, u Bah Banshan Kharkongor, Assistant Professor ka Union Christian College, Umbir nalor kiwei kiwei ki ophisar, ki nongtrei sorkar bad ki ‘riew pawkhmat ka thaiñ.
Haba ai jingkren, u Dr Celestine Lyngdoh u la pynpaw ïa ka jingsngewkmen ba kum ka jylla ka la ïoh ban kynjoh ïa ka rta kaba 53 snem lynter bad kum ki paidbah nongshong shnong, ki dei ban shad kmen halor une u mawmer uba kum ka jylla ka la kynjoh.
U la ong, “Jin lada ka Meghalaya ka dang hap hapoh ka jylla Assam, ngin nym nang ban kren phareng kumba nang mynta, namar ha ki skul ka jylla Assam la pyndonkam tang da ka ktien Assamese.” U la ïathuh ruh ba haba u ïakynduh ïa ki paralok na ka jylla Assam, lait noh kito kiba leit ha ki skul ba hikai da ka ktien phareng, ki ju ïaroh ïa ki briew ka jylla Meghalaya halor ka jingnang ka jong ki ban kren phareng wat lada kim nang tiak-tiak ruh, hynrei tang ban ïa sngewthuh.
U Dr Celestine u la ong, “Kane ka jinghap ka jong ngi ban nang kren phareng, ka dei namar ka jingpher ktien hapdeng ki jaidbynriew ka jylla, da kaba ai nuksa ba kan shem jingeh ïa ki Khasi ban sngewthuh ïa ka ktien Garo bad kane ka pynlong ïa ngi ba ngi hap ban nang ïa kiwei pat ki ktien la ka dei hindi ne phareng ban ïakren sngewthuh.”
Ha kaba ïadei bad ka jingïaid lynti kaba 53 snem jong ka jylla, u Dr Celestine u la ong, “Ka mat ba hakhmat ka dei, hato ngin shad ngin leh kmen bad ngin rkhie mynta ka sngi? Ka jubab ka long hooid. Ha ki khyndiat snem, ngim pat don ïa ka surok ‘four lane’, hynrei mynta ngi la ïoh. Dang ha kine ki khyndiat sngi, ka don ka jingdheng kali ha ki thaiñ Sumer ha kaba ki paidbah nongleit nongwan ki la sahkut kumba 2 kynta eiei bad jin lada kam don ka surok 4 Lane lei katno ki paidbah nongleit nongwan kin hap ban jynjar na ka jingdheng kali, da kaba ai nguh ïa U Blei ba ki kam pynroi ki la wan shisha ha baroh ki liang bad ka jingkylli kaba sah mynta ka long hato ngi la hun katto? Ka jubab ka long em, ngi dang hap ban ïaid ka lynti kaba jngai ban kiew shaphrang, ban lenlade bad buh thong hakhmat ban wanrah ïa ka jingkylla na ka bynta ka jingim jong ki paidbah ka jylla.”
Shuh shuh u la buh kyrpad ïa baroh ki ophisar, ki nongtrei Sorkar ba kin poi biang por sha ka jaka treikam ki jong ki bad ba kin trei bad pyndep hok ïa la ka kamram kumba la siew tulop ïa ki, da kaba kyntu kyrpang ruh ïa ki ophisar ba ki dei ban lah ban ñiew ïa ki jingkylla ba ki la lah ban wanrah ha ka imlang ka sahlang ha jaka kaba ki la dep ban trei khnang ba ka jylla bad ka ri hi baroh kawei kan kiew shaphrang ha baroh ki liang.
Katba u Abhilash Baranwal ha ka jingkren u la ong ba ki nongtrei Sorkar ki don ïa ka kamram kaba khraw tam ban pynwandur ïa ka lawei jong ka jylla lyngba ka jinglenlade, ka jingtrei shitom bad ka jingminot thop ha ka kam kaba ki trei ban kyntiew shaphrang ïa ka jylla.
Ha kane ka sngi, la ïoh ruh ïa ka jingbatai lyngkot halor ka jingïaid lynti jong ka jylla Meghalaya ba la ai da u Bah Banshan Kharkongor, Assistant Professor ka UCC, Umbir, ka jingrwai na ka samla Kyntiewlin Mawphniang bad ka jingshad rah kynthei jong ka Raid 12 Lyngdoh nalor ka jingsam ïa ki khusnam sha ki nongjop, kiba la jop ha ka jingïakop mareh marathon na Dulongnar sha Indoor Stadium, Umlyngkdiat kaba la dep ban pynlong ha ka por mynstep.
