
Shillong K’lyngkot 22
Ka Commissionerate of Customs (Preventive), Shillong ha ka Sngi Ba-ar, ka la pynjot ne pynduh noh ïa u drok uba shongdor haduh T.8.5 klur ba la ïoh kurup katkum ka NDPS Act, 1985.
Kane ka jingpynjot bad pynduh noh ïa une u drok ba la ïoh kurup ka long kum shi bynta ban pyni ïa ka kpait saiñ kam (policy) ba ym lah ban pdiang ïa ka kam khaïi drok bad kum shi bynta jong ka Drug Disposal Campaign ka CBIC (Central Board of Indirect Taxes and Customs).
Ha kane ka jingpynjot noh ïa une u drok la wan ban sakhi da ka Drug Disposal Committee kaba la ïalam da u Bah Spencer M Mylliem uba long u Joint Commissioner ka Customs NER bad ki ophisar jong ka tnat Customs bad DRI.
La pynjot bad pynduh noh ïa une u drok ha kata ka rukom ba kan ym ktah ïa ka mariang bad ban pynthikna ba ïa u drok dei ban pynduhjait noh na ka jingpynsaphriang.