Shillong, K’lyngkot 22
Ki paidbah nongshong shnong jong ka Mawïong Rim ki dap da ka jingsngewkhia kaba khraw haduh katta-katta ha kaba ïadei bad ka jingsniew palat jong ka surok, kaba la dap sa tang da ki thliew ki syar bad ka jingjur jong ka pum-pum kaba la buh jingeh shi kat dei eh ïa ka leit ka wan.
Ha ka kyrwoh na ka liang jong ki nongshong shnong ki la pynpaw ba ka surok kaba wan na 1st MLP Battalion, Mawïong Umjapung shaduh Mawïong Rim kaba la sniew shaba palat liam haduh ba ym lah ban ïohi shuh ïa ka surok kaba dap sa tang ki thliew bad ka khyndew saw suda na ka daw ka jingtih ïa ki pipe um JJM kaba ym shym la tep bha wat haduh kane ka sngi ba mynta.
Shuh shuh na ka liang ki nongshong shnong ki la pynpaw ba ha ka snem ba la dep kiba bun ki khynnah skul kiba wan na Mawïong Umjapung lem bad ki tymmen ki kro, kiba kit ba bah ki la mynsaw na ka daw ba btuit kane ka surok ha kito ki por slap bad ym tang katta wat ki taksi kamai kiba ïaid na kane ka surok ki la sahkut ha ka ktieh jong kane ka surok.
Ki nongshong shnong ki la ong ruh ba mynta sa tang katto katne, ki lai tylli ki skul kiba don ha Mawïong Rim kin sa plie noh ha u bnai Rymphang, 2025 bad ruh ba ka por lyiur ne slap ka la hajan, kumta khnang ban ym wanrah kano-kano ka jingeh ne jingmynsaw ïa ki nongïaid lynti, ki la kyrpad ïa ka tnat PHE, PWD lem bad ïa ka executive committee ka Dorbar Shnong Mawïong Rim ba kin shimkhia halor kane ka kam.
