Shillong, K’lyngkot 22
U Myntri Rangbah ka Jylla, Conrad K. Sangma ha ka Sngi Balang u la plie paidbah ïa ka ïing paki ophis jong ka Hima Mawphlang ha Lumrynkew Mawïong, Mawphlang, East Khasi Hills.
Haba ai jingkren ha kane ka sngi, u Sangma u la ñiew ïa kane ka jingplie paidbah kum ka ban sah kynmaw ha ki khana pateng naba u la ong ba ka Hima ka la im bad pyndep ïa ki riti-dustur ba kyntang mynta la jan 1000 snem hynrei ka la treikam khlem ka ophis.
Da kaba khot ïa ka Hima Mawphlang kum ka pateng ka ban sah kynmaw jong ki paidbah, u la ong ba ka la ïeng kum ka dak jong ka lariti, ka riti-dustur bad ka jinglong kyrpang.
U la kular ruh ban mang pisa na ka bynta ki jingdonkam ha ka liang ki jingtei jong ka ophis.
Haba ai jingïaroh ïa ka shnong Mawphlang kum ka jaka jngohkai kaba la burom bha na ka bynta ka ‘Law Kyntang jong ka, kane ka shnong ïa kaba la tip ruh kum ka ‘Heritage Village’, u la pynbna ba la dep ban mang T.25 klur lyngba ka skhim ‘Swadesh Darshan’ na ka bynta ka ‘Tourism Centre’ bad ki kam pynroi haba ïadei bad ki jingtei jong ka ‘Law Kyntang.
U Sangma u la pynbna ruh ba la mang ïa ki kam na ka bynta ka Mawphlang Science & Commercial College bad ki klas kin sdang naduh mynta u snem.
Shuh shuh u la pynbna T.1 lak na ka bynta ka Mawphlang Secondary School bad T.1 lak na ka bynta ka Sh. Pynshailang Lyngdoh bad ka kynhun jong u ban pynbiang ïa ki tiar put tiar tem.
Na ka liang u Myntri Rangbah u la kyntu ruh ïa ka Hima Mawphlang ban pyntikna ba ïa ka pateng ba riewspah la lum thup bad buh jingthoh khnang ban pynneh-pynsah na bynta ki pateng ban wan bad ban ïasam ruh sha ka pyrthei. U la ong ba un sa kner ïa ka ‘CM’s Research Grant’ na ka bynta ban ïaid shakhmat bad ka kam wad bniah ha kitei ki thaiñ.
