T.40 klur pyllait ka Sorkar sha ka JHADC

Ïa kane 'sanction order' u la aiti ha u Chief Executive Member ka JHADC Bah Thombor Shiwat ha ka jingleit ïuhkjat kaba nyngkong eh ka jong u ïa ka ophis treikam jong ka council hadien...

Jowai, K’lyngkot 22

Ïa kane ‘sanction order’ u la aiti ha u Chief Executive Member ka JHADC Bah Thombor Shiwat ha ka jingleit ïuhkjat kaba nyngkong eh ka jong u ïa ka ophis treikam jong ka council hadien ka prokram Meghalaya Day kaba long ha District Library Auditorium, Jowai.

U Myntri Rangbah ka Jylla, Conrad K Sangma ha ka 21 tarik Kyllalyngkot u la pyllait haduh T.40 klur ka bhah khajna na u dewïong sha ka Jaiñtia Hills Autonomous District Council (JHADC).

Ha kane ka sngi la ïadonlang ar ngut ki Symbud Myntri Rangbah ka Jylla, Bah Prestone Tynsong bad Bah Sniawbhalang Dhar, ki Myntri Sorkar ba kynthup ïa u Bah Comingone Ymbon, u AT Mondal, MLA ka Jowai Bah Wailadmiki Shylla nalor ki dkhot Executive Committee ka council.

Na ka liang u CEM, Bah Thombor Shiwat u la pynpaw ïa ka jingsngewnguh ïa u Myntri Rangbah Conrad K Sangma uba la shimkhia ban pyllait ïa kane ka bhah khajna na ka bynta ba ka council kan ïoh ban siew ïa ka tulop jong ki nongtrei kaba la kynjoh sha ka 12 bnai naduh u Lber 2024.

U Bah Thombor u la ai khublei ruh ïa ki ar ngut Symbud Myntri Rangbah bad u MLA kiba la shimkhia ban ïasaid na ka bynta ban pyllait ïa kane ka bhah khajna ka council ban pynjem ïa ka jingeh ki nongtrei bad kumjuh ki dkhot ka council.