Shillong, Nailar 24
U Myntri Rangbah ka Jylla, u Conrad K. Sangma ha ka Lah Sngi U Blei u la ong ba ka Sorkar Jylla ka la shimkhia ïa ki jingjia thombor kiba la jia ha ka jingïaid ‘Bike-Rally’ bad jingteh lama ïong ha Shillong ha ka 19 tarik u Nailar bad kan ym iehnoh, hynrei kan shim ïa baroh ki sienjam ban pyntikna ba ki runar kin ngat ha ki kyndon jong ka aiñ.
Haba wanrah ïa ka ‘Suo-Motu’ (Statement) ha ka sngi sdang jong ka Dorbar Synrai, u Conrad u la ong, “Ha ka 19 tarik u Nailar, la pynlong ïa ka jingïaid ‘Rally’ thuk-thuk teh lama ïong da ka Khasi Students’ Union halor ka jingmynjur jong u Deputy Commissioner ka East Khasi Hills District ryngkat ka jingkular na ka KSU ba ka jingïaid ‘Rally’ thuk-thuk kan long kaba suk ba saiñ bad jai-jai.”
“Hynrei ha katei ka ‘Rally’, ki don katto-katne ngut ki runar kiba la don bynta ha ki kam thombor kynthup ka jingkawang maw ïa 31 tylli ki kali bad ban thombor ïa kiba ïaid ba ïeng – kiba kynthup ruh ïa 8 tylli ki kali kiba don ïa ki nombor Assam; 18 ngut ki la mynsaw bad la rah ïa baroh sha Shillong Civil Hospital ban ïoh ka jingsumar,” u la ong.
U Myntri Rangbah u la pyntip ruh ba ha katei kajuh hi ka miet, la kem ïa u President, Vice-President bad General Secretary ka KSU hapoh ki kyndon bapher-bapher jong ka BNSS bad la pyntreikam ruh ïa ka Meghalaya Maintenance of Public Order (MMPO) Act.
“La ujor 15 tylli ki ejahar haduh mynta ha kaba ïadei bad ka jingjia ha ka 19 tarik u Nailar. La pynithuh ruh ïa 5 ngut ki briew kiba deng ‘mask’ haduh mynta kiba donkti ha ka jingjia ha ka 19 tarik u Nailar khamtam haba ïadei bad ka jingthombor ïa ki kali ba don ïa u nombor Assam. La dep ban kem ïa uwei,” u la ong.
U la pynbna ruh ba ka Sorkar ka la thaw ïa ka Special Investigation Team (SIT) ban pynithuh bad tohkit ïa baroh ki runar kiba donkti ha ki kam thombor ha nongbah Shillong khamtam kito kiba donkti ban thombor ïa ki kali ba don ïa u nombor ka Assam bad ban pyntikna ban pynngat ïa ki ha ki kyndon katkum ka aiñ.
“Ïa ka SIT la khlieh da u IG (Law & Order),” la ong u Conrad.
Ban pyntikna biang ïa ka jingjai-jai hapdeng ka Assam bad Meghalaya, u Myntri Rangbah u la ong ba la pynlong ïa ka jingïalang ha ka 22 tarik u Nailar hapdeng ki ar kynhun.
“Ïa ka kynhun jong ka Meghalaya la khlieh da u Symbud Myntri Rangbah, u Bah Sniawbhalang Dhar katba ïa ka kynhun jong ka Assam la khlieh da u Myntri ba la rangbah ha ka kam, u Atul Bora. Ha kane ka jingïalang la wan ïashim bynta lang ruh da ki Chief Secretary bad ki heh ophisar,” u la ong.
Da kaba pynshong nongrim ïa katei ka jingïalang, la weng noh ïa ka pakhang surok ha Jorabat da ki kynhun seng ka Assam, kaba la ïalam pat sha ka jingmanbha ha ka leit ka wan jong ki mar ba kongsan ha kylleng ka Jylla.
“La thaw kyrpang ruh ïa ka ‘Hotline’ hapdeng ka Assam bad Meghalaya. Ka District Committee kaba neh kaba kynthup ïa u Deputy Commissioner ka Nongpoh bad u Deputy Commissioner ka Kamrup Metropolitan ryngkat bad ki ophisar pulit ha ka kyrdan kaba ïadei na baroh ar tylli ki Jylla ban pyntikna ba ki jingeh kiba mih na ka sngi sha ka sngi ha ki lynter khappud hapdeng ki Jylla la lah ban pynbeit noh kloi ïa ki,” u la bynrap.
“Yn thaw ruh ïa ka komiti ba ïatreilang kaba kynthup ha ka kyrdan Commissioner & Secretary ka tnad Transport na baroh ar tylli ki Jylla ryngkat ki nongmihkhmat jong ki seng ‘Tourist Taxi’ ban pynsuk bad pynbeit ïa ka leit ka wan jong ki nongjngohkai pyrthei bad ban ïada ïa ka jingmyntoi lang jong ka Assam bad Meghalaya ha ka kam jngohkai pyrthei,” la ong shuh-shuh u Conrad.
Shuh shuh u Myntri Rangbah u la pyntip ba la don ka jingïalang ba la pynïaid da u Symbud Myntri Rangbah ka tnad Transport bad ki seng napoh Meghalaya ha kaba ki seng ki la mynjur ban weng noh ïa ka jingïakhih kaba la ïalam pat sha ka jingïaid beit ïaid ryntih jong ki kali; bad ka jingïalang kaba bud bad ka seng kan sa long lehse ha ka taïew kaba ar jong u bnai Nailur ban ïakren shuh-shuh ïa kiwei pat ki mat.
“Nga kwah ban pyntikna sha ki dkhot jong kane ka Ïingdorbar, kumjuh sha ki nongshong shnong ka Jylla jong ngi ba ka jingjia kaba sngewsih kaba la jia ka dei kaei-kaei kaba ka Sorkar ka la shimkhia bha. Ngi la long kiba sted ha ki kam kiba la leh da ma ngi bad ngi kwah ban pyntikna ïa ka ïing bad ki nongshong shnong ka Jylla ba ka Sorkar kan shim lut ïa baroh ki sienjam bad kan ym ailad bad leh katba lah ban pyntikna ba ki runar kiba donkti bad kiba don bynta ha ki kam thombor kin shah pynngat bad shah pynshitom ha ka aiñ kaba ki dei hok,” u la ban jur.
