Shillong, Nailar 24
Ha ka jingïalang ba la khot kyrkieh, ka Khasi Students’ Union (KSU) ka khlem pat shim ïa kano-kano ka rai haba ïadei ka jingkhot ïakren ka Sorkar Jylla, hynrei kan sa shong jingïalang biang lashai ka sngi Ba-ar ka 25 tarik Nailar bad ki nongïalam kiba na ki District bapher-bapher.
U Myntri Rangbah ka Jylla u Conrad K Sangma u la pynbna ba ka Sorkar ka long kaba kloi ban pynlong ïa ka jingïakren bad pynpaw ba ka Sorkar ka la dep ruh ban phah ïa ka shithi sha ka KSU.
Haba kren sha ki nongthoh khubor u Assistant General Secretary KSU u samla Pynshaiborlang Rani u la ïathuh ba ka Sorkar Jylla ka la khot ïa ka KSU ban wan sha ka jingïakren halor ki 5 tylli ki mat jingdawa jong ki hadien ki huri hura kiba mih ha kine ki khyndiat sngi ba la leit.
Shuh-shuh u Samla Pynshai u la ïathuh ba ka KSU ka la ïoh jingtip halor kane ka jingkhot ïakren na ki lad pathai khubor ha ka step sngi Nyngkong bad hadien ka la ïoh pdiang ruh ïa ka shithi hapdeng ka por 11 baje bad 12 baje mynsngi.
U la pyntip ba ka jingpynlong kyrkieh ïa ka CEC ha ka sngi Nyngkong hi ka long kaba eh namar ba hap ban khot ïa ki nongïalam na kylleng ki District. “Ka long kaba eh ban khot ïa ka jingïalang jong ka CEC namar ha ka seng jong ngi, ngi don ïa ki nongïalam na ki District bapher-bapher kum ka West Khasi Hills, South West Khasi Hills, East Jaiñtia Hills, West Jaiñtia Hills bad Ri-Bhoi. Na kata ka daw, lashai ka sngi ngin lum ïa ka jingïalang ba kyrkieh jong ka CEC ha kaba ngin sa shim ïa ka rai halor kane ka shithi kaba la phah da ka Sorkar ba khot ïakren ïa ka KSU” ong u samla Pynshai.
Ka KSU shuwa kane ka la pynlong ïa ka jingïalang ban pynher ehrngiew ïa ka lama bad jingduwai phirat hapoh ka shlem treikam kaba don ha Jaïaw ha kaba la ïadonlang ki nongïalam barim bad ïa kane la leh kum shibynta ban pyneh rngiew ïa ka KSU hadien ka jingshah wan khynra bad pynjulor ki pulit ha ka miet 19 tarik Nailar.
