Shillong, Nailar 24
Ha ka sngi Nyngkong, ki pulit kila kem sa ïa uwei u nongïalam ka Khasi Students’ Union (KSU) haba ïadei bad ki jingjia kam thombor ha ki kynta ïaid ‘bike rally’ jong ka seng kaba la long ha ka 19 tarik mynta u bnai.
Une u nongïalam ka KSU u dei uba bat ïa ka kam Assistant Organising Secretary samla Jeremiah Pohthmi uba dei ruh u President ka KSU Nongmensong bad la kem ïa u na ka thaiñ Nongmensong, pyntip u Superintendent of Police ka East Khasi Hill Bah Vivek Syiem haba ïakren bad ki nongthoh khubor.
U ïathuh ba ki pulit kila rah tian bishar ïa u sha ïingbishar bad pan ïa ka police custody.
Katkum ka jingong ki pulit, u Jeremiah u dei uwei na ki san ngut ki riewtap khmat ba la ithuh durkhmat haduh mynta, kiba donkti ban leh ïa ki kam thombor khamtam ka jingthombor ïa ki kali Assam.
Haba pyntip ba la dep ban thaw ïa ka Special Investigation Team (SIT), u Bah Vivek Syiem u la ong, “Ka jingtohkit ka la ïaid shakhmat. Ïa ka SIT ba la thaw, la peit bad pynïaid da u IG Law and Order bad la shim ruh kiba bun ki lad ki lynti ban pynthikna ba ngin lah ban ithuh bad kem ïa kiba donkti bad ban charge-sheet kham kloi ïa ka case.”
“Ka long shisha kaba eh namar kiba bun ki la kah ïa ki durkhmat (wearing mask) hynrei ka don pat ka rukom ban ithuh ïa ki briew,” u la bynrap.
Shuwa ïa kane, ki pulit kila kem ïa lai ngut ki nongïalam ba hakhmat ka KSU ba kynthup ïa u President samla Raymond Kharjana, Vice President samla Pynkmenlang Sanmiet bad General Secretary samla Reuben Najiar haba ïadei bad kane kajuh ka jingjia.
