Shillong, Nailar 24
U Nongïalam ka Liang Pyrshah, u Dr. Mukul Sangma ha ka Lah Sngi U Blei u la dawa ban ujor ejahar pyrshah ïa kito ki briew (Non-state Actors) kiba khang lynti bad pynthut ïa ki kali ba pynpoi ïa ki mar ba kongsan hadien jong ka jingjia shah thombor ha ka 19 tarik u Nailar, da kaba maham ba ka jingbym leh eiei kan buh jingma shi kat dei ïa ka Jylla.
Haba wanrah ïa ka ‘Point of Order’ hapoh Ïingdorbar ha ka Lah Sngi U Blei, u Dr. Mukul u la ong, “Ngi baroh ngi long ki sakhi ïa ka jinglong-jingman ka bym pat ju jia mynno-mynno kum ka jingkut jong ki jingjia ha ka 19 tarik u Nailar ha kaba ka la buh jingeh pat ïa ki paidbah ka Jylla bad ka Jylla hi baroh kawei,” u la ong.
“Kumno ka Jylla kan ngat ha ki jingeh lyngba kine ki briew (Non-state Actors) bad kumno la pynthut ïa ka jingpynpoi ïa ki mar ba kongsan – kane ka dei ka mat kaba hap ban shimkhia bha. Ngi kwah ban tip kaei ka sienjam ba ka Sorkar ka la shim bad kumno lah ban ïada na kum kine ki jinglong-jingman hadien-habud, bad kumno ban pyngngat pat ïa kum kine (Non-state Actors) katkum ka aiñ khnang ba kan ym buh jingeh ïa ka Jylla ha kano-kano ka por,” u la ong.
Hadien ba u Myntri Rangbah ka Jylla, u Conrad K. Sangma u la wanrah ïa ka ‘Suo-Motu’ (Statement) halor ka jingshah thombor, u Nongïalam ka Liang Pyrshah u la pynbor biang ban shim ïa ki sienjam katkum ka aiñ.
“Kino-kino ki sienjam kiba la dep ban shim da ka Sorkar ki long kiba donkam, hynrei ka long ka jingshisha ba ym don mano-mano ba don hok ban buh ïa ka Jylla ha ka jingeh bad pynthut ïa ka jingpynpoi ïa ki mar kiba kongsan. Hato la ujor ejahar pyrshah ïa kito kiba khang lynti?” la buh jingkylli u Dr. Mukul.
“Ngi hap ban don ka bor ka ban khmih lynti lypa ïa kiba kum kine ki jingjia kiba pynjah burom ïa ka Jylla, namarba kine ki long kiba ma ïa ka Jylla. Nga kyrpad ba dei ban shimkhia. Nga dawa ba dei ban ujor ejahar pyrshah ïa kito kiba buh jingeh ïa ka Jylla, khamtam eh kiba pynthut ïa ka jingpynpoi ïa ki mar ba kongsan. Lym kumta, ngin sa ïohi biang ïa kum kane ka ‘tamasha’ na ka por sha ka por,” u la ong.
Hadien, haba kylli halor katei ka jingdawa, u Myntri Rangbah ka Jylla, u Conrad K. Sangma u la ong, “Ngi dang tohkit ïa baroh ki liang bad ngim khang ïa kino-kino ki lad.”
