Jowai, Nailar 24
Ka Jaiñtia Students’ Union (JSU) ha ka 24 tarik Nailar ka la leit ban mudui da ka Public Interest Litigation (PIL) sha ka ïingbishar Meghalaya High Court kaba tynjuh pyrshah ïa ka ‘public hearing’ na ka bynta ka projek tih mawhun jong ka Shree Cement Ltd ha Lum Syrman hapoh Elaka Nongkhlieh.
Ïa kane ka PIL la mudui da ka JSU hapoh ka jingïalam jong u Education Secretary u Bocheru Mi Pohsnem bad u General Secretary u Neilkee Mukhim pyrshah ïa ka ‘public hearing’ kaba la pynlong ha ka 31 tarik Naitung, 2026, ïa kaba ka seng ka la kynnoh ba ka dei kaba la shu leh donbor.
Ka seng ka la ong ba ka la shim ïa kane ka sienjam ban leit mudui sha ka ïingbishar hadien ba baroh ki lad jingïakren bad ka Sorkar ki la pulom.
Lyngba u kyrwoh ka JSU ka la kam ba wat hadien ba ka la phah ïa ki dorkhas bad bun tylli ki ejahar sha ki bor district bad pulit, hynrei ka Sorkar Jylla kam shym la lah ban shim ïa ki sienjam ban pynbeit lane ban pynsangeh ha kaba ïadei bad ka jingai jingbit.
“Ka jingleh bym suidñiew jong ki bor Sorkar ka la wan long ruh katba ka jingujor sha ka Meghalaya Human Rights Commission (MHRC) bad ka National Green Tribunal (NGT) ka dang sahteng,” ong ka JSU.
Haba kdew ïa ka jingpynlong ‘public hearing’ kum ka jingleh donbor, ka JSU ka la kynnoh ba la pynlong ïa kane ka ‘hearing’ tang hapoh ka 46 minit ha kaba bun ki kynhun kiba dei hok ban don bynta kynthup ïa ki trai jaka ki la shah khanglad ban ïashim bynta.
Ka seng ka la kynnoh ruh ba ki paidbah kiba pynlong da ka jingïakhih ba jai jai ki la ngat ha ka jingshah thombor ha ki kynhun runar bad ka kali ambulance ruh ka la ngat ha ka jingshah thombor kaba la pynlong ïa u nongñiah ba un ngat ha ka jingmynsaw jur. Haba kynnoh ïa ka jingdon bynta lang jong ki pulit, ka seng ka la ong, “Ha ka jaka ba kin khanglad ïa ki kynhun runar kiba pynjulor ïa ki jingdon jingem jong ki paidbah, ki pulit ki la pyndonkam pynban da ki lyer pynsat khmat pyrshah ïa ki samla trai muluk kiba pynlong ka jingïakhih ba jai jai bad kaba pynlong ïa ka ejahar ba kan tlot bad ka jingpynngat kyndon kaba lah ban bah jamin khnang ban ïada ïa ki nongthombor.”
Haba maham ban pynlong da ka jingïakhih paidbah lada ym ïoh ïa ka jingbishar hok, ka JSU ka la ong, “Ngi kyrmen ba ka ïingbishar High Court ka dei ka lad kaba khatduh, bad lada kam seisoh ngim don shuh da kiwei pat ki lynti hynrei ban mih sha surok.”
