Shillong, Nailar 24
U Bah H. Bansiewdor Nonglang, Chairman ka Green Tech Foundation (GTF), ha ka sngi Nyngkong jong ka taïew u la leit ban ujor ejahar ha Thanad Sadar pyrshah ïa u wei u bar jylla ïa uba la tip kyrteng u Satya Ranjan Borah uba la kren tohmet bad kren tam ïa ka Jylla Meghalaya.
Kane ka jingkren tam u tei u bar jylla, kadei naduh ka por ba sdang mih ka huri hura ba pynlong rally arshaka ka Khasi Students’ Union (KSU).
Haba kren sha ki lad pathai khubor, u Chairman u la ong ba kum ki nongshong shnong, kim lah ban pdiang bad ym lah ruh ban shah ïa ka jingkren tohmet bad shah kdew kti ïa baroh ki briew ka Jylla.
Da kaba kdew ba u tei u bar jylla, u la sdang ban pyllait paidbah ïa ki durkih kiba u kren tohmet naduh ba jia ka jingïakhih myn ha ka 19 tarik u Nailar haduh mynta ruh.
Shuh shuh u la ban, ba kaei ka ba jia ha ka jaka jngoh kai pyrthei kaba la tip kum ‘U Mawjymbuin’ u la ong ba u dei une hi u juh u briew, uba pyrshang ban kynshoit bad ïalam bakla ïa ki paidbah ha kylleng ka ri.
“Lyngba ka facebook account jong une u bar jylla uba dei na Assam, u la sdang ban kynshoit bad byrngem ïa ki Khasi ha Meghalaya bad u la kynnoh ruh ba ka KSU kadei ka seng ki lehnoh,” la bynrap u Bah H.B Nonglang.
“Kaba kham sngewbitar shuh shuh, kadei ba u la kynnoh ba ki khristan ka Meghalaya kidei ki lehnoh, bad u la kynnoh ba ka KSU, kadei ka seng lehnoh kaba la bei pisa da ka u Myntri Rangbah ka Jylla Meghalaya,” u la ong.
“Kumta u la ong ba ym dei ban ailad ba ki nongwei kin kren tohmet ïa ka jaidbynriew Hynñiewtrep jong ngi. Nga phah ruh ka khubor sha une u briew, ba lada u kren ha ki social media, kren da antad bad burom ïa ka aiñ, namar ngim pdiang ïa kaba kum kane ka jingkren tohmet ïa ka Meghalaya.”
Ki pulit ka Sadar kidei ban wad bad kem ïa une u briew mardor, u la ong.
