Shillong, K’lyngkot 23
Ki pulit ka nongbah Shillong ha ka Sngi Palei ki la ïoh ban kem noh ïa uwei u briew uba la byrngem ban pynbthei bom ha kylleng ki jaka ka nongbah Shillong ha kaba u la phah ïa kane ka jingbyrngem lyngba ka SMS na ka mobile phone kaba u pyndonkam.
Ïa une uba la shahkem la tip kyrteng kum u Edward Maïong, 37 snem ka rta bad la kem na ka jaka sah kaba shipor jong u ha Lower New Colony, Laitumkhrah hadien ka jingbuddien bad jingtohkit ki pulit.
Na ka liang u Superintendent of Police ka East Khasi Hills District, Bah Vivek Syiem, u la ong ba la ïohpdiang ïa ka jingujor ha ka Sngi Balang ba une u briew u la phah da ka SMS na ka mobile phone kaba don ïa u nombar phone u bym lah ban ithuh ha kaba u la thoh ba ka don ka jingthmu pynbthei bom ha kylleng ki jaka ka nongbah Shillong bad une u briew uba phah SMS u la kam ïalade ba u dei na ka kynhun ‘Ri-Bhoi Gang’.
U SP u la ong ba tang hadien ba la ïohpdiang ïa kane ka jingujor, la pynrung ïa ka jingujor ha Thanat Sadar “Case No. 29(01)2025 u/s 351(4)/353(2)/61(2) and 113(2)(b) BNS Act.”
Hadien kane, mar-mar ki pulit ki la sdang ban buddien bad tohkit khnang ban lap ksai ha ryngkat ka jingïatreilang bad ki pulit na kiwei ki district.
Ynda la ïaid ka jingtohkit naduh ka Sngi Balang, ki pulit Special Operation Team (SOT) ki la lap ba kane ka SMS ka dei kaba la phah da utei u briew na ka phone kaba u pyndonkam bad la ïoh ban kem noh ïa u ha ka Sngi Palei, bad la kurup ruh ïa ka mobile phone.
Haba kylli la une uba shahkem u don jingïadei ne em bad kano-kano ka kynhun pyntriem, u SP u la ong ba ka jingtohkit ka dang ïaid bad ym lah ban shu kyntait ïoh ba u don ka jingïadei ruh namar ki don ki sabut kiba kdew shata pyrshah ïa u.
Kumta u la ong ba ki pulit ka district ki pynlong ka jingpeitngor bad pynkhlaiñ ka jingpahara khamtam eh ban khanglad ïa kano-kano ka jingthmu ban leh kino-kino ki kam pyntriem ban pynthut ïa ka Republic Day. U SP u la pan ruh ka jingïatreilang jong ki paidbah bad lada don kano-kano ka jinglong-jingman kaba long kyrkieh dei ban pyntip sha ki thanat kiba kham jan bad Police Control Room +91 6009196479 lane ñion ha u nombar 112 khnang ba ki pulit ki lah ban leh ïa kaba donkam.
