
Shillong, K’lyngkot 23
Ki paidbah nongshong shnong ka Umñiuh-Tmar bad kiwei ki shnong kiba don ha ka thaiñ Ri-War Pynursla ki la khie bitar lep ïa ka jingphah siew jong ka MeECL ïa ka bai ding kaba la dep siew ha ki snem ba la leit.
Katkum ka jingïathuh ki ‘riew rangbah, ka ophis u SDO ka MeECL Pynursla, ka la phah shithi sha ki trai ïing ha ka shnong Umñiuh-Tmar bad kiwei ki shnong ha ka thaiñ ba kin siew ïa ka bai thang bording kaba dei jong u snem 2015-16, ha kaba don ki longïing kiba ka MeECL ka phah siew haduh T.10 hajar, ki don kiba haduh T.25 hajar ruh.
Kane ka jingleh jong ka MeECL ka la wanrah ka jingkyndit ïa ki paidbah nongthang bording, namar ba ki la dep siew tista ïa ka bai thang bording khlem da pynsah teng satia.
U Sirdar ka Umñiuh-Tmar, Bah Nanglamlad Khongshah u la ïathuh ba ha ka Sngi Balang u la lum ïa ka jingïalang ki nongshong shnong halor kane ka kam, bad ha kane ka jingïalang ki la rai ba ma u un leit mih sha ka ophis jong ka MeECL ha Pynursla ban ïakren, bad lada jia ba ka kam, kam ïaid kumba ki la thmu, ki nongshong shnong kin sa shim da kiwei pat ki sienjam.
“Ki nongshong shnong ka Umñiuh-Tmar Elaka ki la khie bitar lep hadien ba ki la ïoh ïa ka shithi ban phah siew ïa ka bai thang bording kaba ki la dep ban siew. Ka jingïalang hynnin ka sngi, ka la rai ban phah leit mihkhmat ïa nga sha ka ophis jong ka MeECL Pynursla halor kane bad lada kam sngap ïa ka jingïakren, ki paidbah kin ïaid shakhmat”, la ong u Sirdar.
La ïoh jingtip ba kum kane ka jingjia ka la jia ruh ha kiwei ki shnong kiba don ha katei ka thaiñ ha kaba ki briew baduk ki la kyndit kumba ïuh tdong bseiñ haba wan poi ka shithi na ka MeECL ba kin hap siew ïa ka bai thang bording kaba la kot da ki hajar bad phew hajar wat haba ki la dep siew sha u nonglum ha kitei ki snem.
U Sirdar ka Umñiuh-Tmar u la ïathuh ba wat ki skul ruh ki ïoh ïa kane ka shithi na ka MeECL, kaba la pynshaïong ngaiñ ïa ki paidbah.