Dei ka jingmynjur lang ki kyrtong ïa ka ‘Common Platform’, ka MTD kam donbor ban khang: President

Ka Mawlai Town Dorbar (MTD) ka la pynbna paidbah ha ka Sngi Palei ïa ka rai ba la dep mynjur lang bad ki kyrtong ki ban sa ïakhun ha kane ka ilekshon MDC na Mawlai...

Shillong, K’lyngkot 23

Ka Mawlai Town Dorbar (MTD) ka la pynbna paidbah ha ka Sngi Palei ïa ka rai ba la dep mynjur lang bad ki kyrtong ki ban sa ïakhun ha kane ka ilekshon MDC na Mawlai Konstitwensi ban pynlong ïa ka jingïalap ilekshon da kaba wan lang ha kajuh ka rynsan lane ‘common platform’ ha man la ki shnong khnang ban ym shah ktah ki samla pule kiba dang don hapdeng ka eksamin, bad ha kajuh ka por ka la kyntait ïa ka jingkynnoh jong ka VPP ba ka MTD ka thmu ban khang ïa ka jingïalap ilekshon ha Mawlai.

Ka MTD ka la shim ïa ka rai ha ka jingïalang kaba la long ha ka Sngi Balang ka 22 tarik Kyllalyngkot 2025 hapdeng ka Mawlai Town Dorbar lem bad baroh ki kyrtong kiba thmu ban ïakhun ïa ka ilekshon MDC na Mawlai konstitwensi.

Haba kren sha ki lad pathai khubor ha ka Sngi Palei, u President ka Mawlai Town Dorbar, Bah Herlambok War u la ïathuh ba ka jingshim ïa kane ka rai ban pynlong da ka Common Platform ha man la ki shnong ka dei kaba la mynjur lang da baroh ki kyrtong kiba la wan sha ka jingïalang. Ka jingshim ïa kane ka rai ka dei hadien ba ka Mawlai Town Dorbar ka la sngap ïa ka jingud jingnam ki kmie ki kpa bad ki nonghikai kiba la pynsngew ïa ka jingshah ktah ki samla pule namar ba ka jia ryngkhat ba ki samla pule ki hap ban thoh ïa ka eksamin.

Kumta u la ong ba ka Mawlai Town Dorbar ka la khot lang ïa ki kyrtong ban ïakren bad pynsngew halor kane bad na ka liang jong ki ruh ki la ïa mynjur lang khamtam namar ba ka dei na ka bynta ka jingbiang lang jong ki samla pule kiba dei ban thoh ïa ka eksamin.

Haba pynshai halor ka jingkynnoh ki nongïalam ka VPP ïa ka Mawlai Town Dorbar, u Bah War u la kyntait ïa ka jingkynnoh ba ka Mawlai Town Dorbar ka khang ban pynlong jingïalap ilekshon, namar ym lah satia ban khang hynrei ka dei tang ka jingpynsngew sha baroh ki kyrtong ha kaba la don ruh ka jingmynjur lang da baroh ban pynlong da ka ‘Common Platform.’

U Bah War u la pynshai ba ka Mawlai Town Dorbar ka la dep pynsngew sha baroh ki kyrtong ha ka jingïalang ïa kaei kaba kum ka Mawlai Town Dorbar ka ïohi bad mad ïa ki jingeh ha ki ilekshon ba la dep khamtam ha kane ka ilekshon ba kin sdang ki eksamin bapher bapher kaba ktah ïa ki samla pule hapdeng jong ka jingthnem ka jingïalap ilekshon khamtam haba la mih bun ngut ki kyrtong.

Hynrei u la ong ba ka long kaba kyndit bad ym lah ban pdiang namar ha ki social media la kynnoh ba ka Mawlai Town Dorbar ka khanglad ban ïalap ilekshon ïa ka VPP namar ka dei kaba la mynjur lang da ki kyrtong baroh ban leh da ka Common Platform bad kam dei satia ka jingkhanglad ïano-ïano namar ka MTD kam donbor hi ban khang kumta.

U la bynrap ba lada baroh ki kyrtong kin leit sha man la ki shnong kan ktah shisha ïa ki khynnah pule ha kaba u la pynshai ruh ba ka Mawlai Town Dorbar ka khlem khang bad kam don aiñ hi ruh ban khang hynrei ka dei ka jingai jingmut kaba poi sha ka jingsngewthuh jingmut lang lem bad ki kyrtong ban pynlong da ka Common platform.

Shuh shuh, u Bah War u la ong ba ka Mawlai Town Dorbar hadien ba la ïahun bad mynjur lang, kan sa phah jingthoh sha baroh ki kyrtong bad yn shim lypa ruh ïa ka jingpynbeit ban leit pan jingbit ban pynlong ïa ki Common Platform ha man la ki shnong ha kaba ka jingwan pynshai ki kyrtong kan long beit ha shnong bad ki nongshong shnong jong kata ka shnong kin wan ban sngap ïa ki jingkren jong ki kyrtong.

Kumta u la ong ba ka MTD kan ïaid beit kumba la mynjur ban pynlong ïa ka Common Platform bad lada don napdeng ki kyrtong ki bym treh, ka MTD kan ïaid beit ban pynlong tang bad kiwei pat ki kyrtong kiba pdiang ïa ka jingmynjur lang.

Ha kawei pat ka liang, u dkhot barim tam ka Mawlai Town Dorbar uba dei ruh u Rangbah Shnong ka Mawlai Mawdatbaki, Bah B.R Kharmujai u la ong ba ka jingshim rai ban pynlong da ka Common Platform ka dei ka jingmynjur lang jong baroh hynriew ngut ki kyrtong bad lada mano-mano na ki kyrtong kiba la dep pdiang bad mynjur ïa ka rai, ki kylla ktien noh, kata ka dei ka ksan rympei rem dorbar.

“Uta uba la kohnguh bad mynjur lang hakhmat ka Dorbar hynrei ynda la poi ha ïing u shah kynroi, ïa uta ngin ñiew kum uei? Kaba shai ka long ba ka dei ka rai kaba la mynjur lang bad kum u Rangbah Shnong ka Mawdatbaki nga sngewthuh bha ïa ka jingeh ki nongshong shnong khamtam namar ka Mawdatbaki ka hap ha ki ar tylli ki konstiwensi. Kumta ka dei ka kamram jong ngi ban burom lang ïa baroh,” la ong u Bah Kharmujai.

U Bah Kharmujai u la ong ruh ba ka jingpynlong ïa ka Common Platform, kam dei kaba leh khyllah tang da ka Mawlai Town Dorbar hynrei ka dei kaba ju leh ha kylleng ka pyrthei bad ka dei kaba biang tam ïa ki kyrtong ban pynshai sha ki paidbah. U la bynrap ba ha ka ilekshon kaba la dep ruh la pynlong ïa ka Common Platform kaba dei hi ka jingïalap ilekshon ha kaba ki kyrtong ki ïoh lad ban pynshai ïa ka nongrim jong ki.