
U Nongsaiñ Hima,1987
Lada ka jaidbynriew ka dei ban im bad ïaid shaphrang,donkam eh ba ka dei ban long kaba sngewthuh bad pyndonkam ïa la ki khmat bad ka ja-bieng ban rai ban mut dur. U Blei U Trai Nongthaw U la ai ïa ki khmat artylli bad kine ruh la buh ha ka rukom ba kin lah ban peit jngai.
Hynrei ki mrad pat ki khmat jong ki, ki dem sha khyndew. U briew um ïapher na ki mrad namar u long hi u jingthaw kum u briew hynrei ka jingïapher ka long ba u mrad um don ka jingstad (rationality)hynrei u briew u don. Hangne shong ka jingïapher kaba khraw tam hapdeng u briew bad u mrad. Kumta ka long kaba shongñia bad kaba dei eh ba u briew u dei ban pyndonkam bha ïa kata ka jingstad kaba la bsiap ha u briew da u Blei.
ïa ka Ri India la seng nongrim ha ka Synshar Paidbah bad ka Synshar Paidbah ka dawa na iwei pa iwei na ngi ban pyndonkam hok ïa la ka hok kynti ba la pynkhamti ha ngi ïa ka ban jied ïa la ki nongmihkhmat ki ban bat ïa ka jingsynshar bad ïalam ïa ka Ri.Dei u paidbah uba jied ïa la ki nongmihkhmat bad ïa la ki nongsynshar bad kane hi ka dawa rangbah rangsan na u paidbah ïa ka jingshemphang ka jingtip jong u kaba tikna ba ïa uno un jied bad ïa uno un kyntait. Dei ha kata ka jingjied ba ka shong ka jingbha bad ka jingroi ka Ri bad ka jaidbynriew.
Ka jingjop jong ka Synshar Paidbah ka shong shibun ha ka jingshemphang jong u paidbah ha kaba jied ïa la ki nongmihkhmat.Lada la jied ïa ki Nongmihkhmat kiba kheiñ sting ïa ka kam ne kiba shu kwah tang ban ioh jakpoh na kata ka kam mihkhmat ne ïa kito kiba kwah ban ioh bam shi bam shi bam dud ne shong paki dulan, te lah ban ong ba ka jingroi jong ka Ri bad ka jaidbynriew ka la dep.
Kane ka jaidbynriew jong ngi kaba don tang kumba saw lak tam bad kaba don ha ka shibun ki jingeh kiba pynrit bad pynraij ïa ka jaidbynriew, kane ka jaidbynriew ka donkam shisha ban jied ïa ki nongmihkhmat kiba snar bad kiba ka hooid ka long ka hooid bad ka em ka long ka em.
Ka long kaba donkam eh ba u paidbah un hap kheiñ hap shat bha ioh ba u ngat ha ka riam ka shet ka phon, namar ha kane ka Ri jongngi la bunsien ngi la liat bad shah sboh khaw tyndep bad mynta ka la dei ka por ba u paidbah u la dei ban bam khyndew ban ioh biang ïa la ka rngiew.