Lyngba ka hat-trick u Thompson pynliem ka Mawpat Ïa ka Lamlynti, 1 kol jop ka Mawkhar ha ka SSA Champions Cup

Shillong, Naiwieng 16 Ka Mawpat SC ka la lah ban pynliem da 9-1 kol ïa ka Lamlynti FC, katba ka Mawkhar SC ka la jop da 1-0 kol ïa ka Sei La Sap FC, ha...

Shillong, Naiwieng 16

Ka Mawpat SC ka la lah ban pynliem da 9-1 kol ïa ka Lamlynti FC, katba ka Mawkhar SC ka la jop da 1-0 kol ïa ka Sei La Sap FC, ha ka lympung ïalehkai SSA Champions Cup 2026 ha ka lah sngi U Blei ha SSA Stadium, Polo.

Ha ka jingïalehkai ba nyngkong, ka nam tam jong ka Mawpat ka la wan lyngba ka hat-trick ba la khur da u Thompson Lyngdoh (46′, 51′, 70′) bad ba kan dei ruh ka hat-trick kaba ar ha kane ka samoi ïalehkai ba mynta jong kane ka lympung.

Ka jingïakhun hi ka long ba naduh kaba sdang ka Mawpat SC ka la lah ban tehlakam bha ïa ka jingïalehkai bad ïa ki kol kiba sah la ïarap ban thep da u Donboklang Lyngdoh (17′, 87′), Denelson Pyngrope (27’P, 74’P), Sparkle Khongshei (35′) bad Dajiedlang Wanshnong (53′).

Ban lait na ka jingshah brut, ka Lamlynti ka la lah ban pynphai kylla shi kol lyngba u Ïalam Kshiar (20′).

Lyngba kane ka jingjop, kan pynlong ïa ka Mawpat SC ba kan khur 7 poiñ na ki lai sien ïakhun ba ka la dep, bud pat sa ka Mawlai SC kaba don ha ka kyrdan kaba ar hadien ba ka la ïoh ba kan khur 6 poiñ bad ka Lamlynti ka don ha ka kyrdan kaba lai hadien ba ka la ïoh 3 poiñ.

Katba na ka liang ka Mawkhar SC, ka jingjop ïa ka Sei La  Sap da 1 kol ka pynlong syndon ïa ka ba kan kiew sha ka kyrdan kaba ar ha ka Group-B.

Ïa ka shi kol  jong ka Mawkhar SC, la ïoh ban thep da u Ibanjop Kharjarin (77), ha kaba u la ïoh ba un pyndei da ka khlieh ïa ka bol kaba la wan kham nalor jong u, tad haduh ba u rangapkol ka Sei La Sap u Aiboklang Jyrwa um shym la lah ban  pyllait na ka jingshah thep.

Hadien kane, u Melbertson Kharbangar u la ïoh ban khyrwit jam bha ïa ka bol kaba la lait salit ban pynkhih ïa ka jar na bynta ka Sei La Sap, bad na ka liang ka Mawkhar ka la ïoh ïa ka kabu ksiar lyngba u Emanuel Rongrin.

Ha ka sngi Ba-ar ka jingïakhun ha ka Group-B kan long hadpeng ka Sohryngkham SC pyrshah ïa ka Sanmer SC ha ka por 11 baje mynstep, katba ka Mawpdang SC pyrshah ïa ka Nongkrem SC ha ka por 2:30 nohphai sngi kaba dei na ka bynta ka Group-A.