
Shillong, K’lyngkot 23
Ka Deputy Commissioner (DC) jong ka East Khasi Hills ha ka Sngi Palei ka la pynmih ïa ka hukum ban khang ïa ki kali kit skum (trok/pickup) palat pud ba kin rung sha sor Shillong.
Ka hukum ka ong ba ka jingïaid jong kine ki kali ba kit palat pud, ka buh ha ka jingbym shngaiñ bad jingma, bad ki lah ban ïatyngkhuh bad ki waiar bording kaba lah ban lam sha ka jingpluh ding kaba shyrkhei.
Nalor kane, ki skum kiba hap na kine ki kali ki la pynjaboh ruh ïa ki surok ha ki shnong ki thaw, bad pynsepei ïa ka jingpynkhuid shnong ba shisien shisnem jong ki shnong ki thaw.
Ka hukum ka la maham ruh ba kino-kino kiba pynkheiñ ïa kane ka hukum kin shah pynsaja hapoh ka kyndon 223 jong ka BNS.