Shillong, K’lyngkot 23
Ha ka jingbteng ïa ka thma pyrshah ïa u drok hapoh ka jylla, u Myntri Rangbah ka Jylla Conrad K Sangma ha ka Sngi Palei, u la lamkhmat ban thang noh ïa u drok ba shongdor haduh T.53.86 klur ba la ïoh kurup na kylleng ki District ka Jylla.
Ïa une u drok la thang ha ka atoskhana ba rhem jong ka kompani Star Cement Ltd kaba don ha Lumshnong, East Jaiñtia Hills District.
Kane ka jingthang ïa u drok ka dei kaba la leh da ka High Level & District level Drugs Disposal Committee ka tnat pulit ka jylla. Ha kane ka sngi nalor u Myntri Rangbah, la ïadonlang ki Symbud Myntri Rangbah Bah Prestone Tynsong bad Bah Sniawbhalang Dhar, ka Myntri ka Koit ka Khiah Kong Ampareen Lyngdoh, ka DGP Kong Idashisha Nongrang bad kiwei kiwei ki heh Sorkar.
Kine ki drok ba la thang ki dei jong ki case NDPS ba la register ha ki 5 tylli ki District ka Jylla-ka East Khasi Hills, West Khasi Hills, Ri-Bhoi, West Jaiñtia Hills bad East Jaiñtia Hills District. Kine ki drok ki kynthup ïa u heroin ba T.23.98 klur, u ganja ba T.7.6 klur bad u methamphetamine ba T.21.3 klur.
Haba kren ha ka jingïalang, u Myntri Rangbah u la ban biang sa shisien ïa ka jingkut jingmut jong ka Sorkar ban pynduh jait ïa u drok uba la pynjot ïa ka jingim jong kiba bun ki samla ka Jylla.
U la ong ba ka Sorkar lyngba ka Drug Reduction, Elimination, & Action Mission ne ka projek DREAM, ka la ai ka jingkyrshan ïa ki samla kiba ïakhun ban pyllait noh ïalade na u drok.
U Bah Prestone u la ai khublei ïa ka tnat pulit bad kiwei ki tnat kiba don bynta lang haba kren ïa ka jingtrei shitom jong ki. “Ki Pulit hapoh ka jingïalam ka DGP, ki la leh ïa ka kam kaba khraw bha. Kane ka prokram ka dei ka nuksa ïa ka jingïatrei shitom lang jong baroh ki kynhun ban pynduhjait ïa u drok hapoh ka Jylla,” u la ong.
Ka DGP ka la kular ïa ki paidbah ba kan don ka jingthang ïa u drok haba shit haba shai haba bynrap “Baroh ki sienjam ban shem la leh hadien ba bud ïa ka aiñ bad ïa kine ki kam la buh jingthoh ban pynbiang ïa ka jingkheiñ jingdiah”.
