Nang ïoh bor ka Congress ha Mawkyrwat, pynïasoh ki nongkyrshan ka NPP, TMC & UDP

U Bah Medalsing haba ai jingkren u la pynpaw ïa ka jingkmen kaba khraw ban ïohi ïa ka jingwan pynïasoh ki briew thymmai sha ka Congress.

Mawkyrwat, K’lyngkot 23

Ka Congress ha Mawkyrwat ka la nang ïoh mynsiem bad nang ïoh bor shuh shuh hadien palat spah ngut ki paidbah kynthup ïa ki nongïalam bad ki nongkyrshan na kiwei ki seng saiñpyrthei ha ka 23 tarik u Kyllalyngkot 2025 ki la wan pynïasoh ïalade sha ka Congress na ka bynta ban ai jingkyrshan pura ïa kane ka seng ha ka ilekshon MDC ka ban long ha u Rymphang 2025.

Ki paidbah kiba wan pynïasoh ha kane ka sngi ki long na ka TMC, NPP bad UDP bad ki nongïalam ba kham hakhmat eh ki long Bah Daros Ramsiej, Vice President TMC Mawkyrwat Block, Bah Alosis Nonglait, Organising Secretary TMC Mawkyrwat Block, Kong Prelim Marweiñ, Chief Organizer TMC, Bah Brightstar Wanniang, General Secretary TMC Youth Wing, Bah Philip Marwein, Bah Grammingstar Mylliem, Kong Risha Iawphniaw bad kiwei kiwei.

Ïa kine ki nongïalam bad nongkyrshan la pdiang burom da u Bah Medalsing Lyngdoh kyrtong ka Congress bad u Bah Kynpham V Kharlyngdoh, President District Congress Committee ha ryngkat ka jingdonlang u Bah JM Lyngdoh, Vice President Kong Philis Kharwanniang, President Mahila Block bad kiwei kiwei.

U Bah Medalsing haba ai jingkren u la pynpaw ïa ka jingkmen kaba khraw ban ïohi ïa ka jingwan pynïasoh ki briew thymmai sha ka Congress. U ngeit skhem ba ka jingwan jong ki, ka dei ba ki kwah naduh ka mynsiem bad ka dohnud na ka bynta ban pynkhlaiñ ïa ka Congress ha Mawkyrwat.

U la ong ruh ba ki paidbah mynta ki la sdang ban phai khmat sha kane ka seng namar ki ïohi ba dei tang ka Congress kaba don ïa ka jingkyrmen na ka bynta ka lawei jong ka ri bad ka jaidbynriew bad tang kane ka seng kaba lah ban ïada ïa ki jaidbynriew rit paid hapoh ka ri.

Shuh shuh, u la pynpaw ïa ka jingangnud ba lada u shah jied kum u nongmihkhmat un leit sha District Council ban ïasaid na ka bynta ki paidbah bad wanrah ïa ki aiñ kiba khlaiñ ban ïada ïa ka khyndew ka shyiap ka riti dustur bad ban pynkhlaiñ ïa ki Dorbar Shnong.

Kumta na ka liang u Bah Medalsing u khot u wer ïa baroh bad ki nongkyrshan ba kin trei shitom hapoh ki shnong ki thaw khnang ba ka Congress kan ïoh biang ka jingjop donburom ha ka ilekshon MDC na Mawkyrwat.